Lokman@MIRROR適婚年齡望有樓傍身 奶茶︰每吋土地都係錢

更新時間 (HKT): 2021.02.27 02:02

7年前的《狂舞派》闡述年輕人為理想可以「去到幾盡」,故事勵志。7年後黃修平導演的《狂舞派3》再現,目前已在上映,截至前日(25日)票房約為330萬元。難得的是導演捨易取難,放棄食老本,話鋒一轉借年輕人向地產霸權作出控訴。

《狂舞派3》沿用上一集演員,包括楊樂文(Lokman@MIRROR)同劉敬雯(奶茶),《狂舞派》促成劉皓嵐(劉小華)拜奶茶為師習舞。三人早前為電影宣傳,在電影主要取景地觀塘接受《蘋果》訪問,Lokman形容三人的合作駕輕就熟,他說:「我同奶茶由第一集開始合作,成日跳舞、食飯見面,經常有教小華跳舞,而奶茶間中都有做客席導師教我哋啲小朋友。大家有時都訴吓苦、安慰,默契係越來越好,我哋跳同一樣舞種,大家溝通語言好相似。」

Lokman望成家置業

今集故事集中在觀塘發生,拍攝地點離不開九龍東,Lokman說這一帶聚集五湖四海人物,打從偉業街到鴻圖道一帶,不少人從事廣告工作,不乏有性格亦有型的男女。新一集主題講地產霸權,土地問題對31歲的Lokman而言體會頗深,他說:「我哋租排舞室都係幾個人夾錢,但係地方唔大,容納7至8人已經擠逼,亦可以話『親切』,就係呢個城巿搞藝術嘅特色。要喺香港擁有物業,夢想比《狂舞派》首集更加大,好唔容易,當然想擁有自己地方,年紀都差不多,好似快要成家立室,點都要有層樓傍身。」

經歷一年疫情,Lokman指去年整年生活困難,但趁有時間,重新認識自己、沉澱思考是否喜歡跳舞、演戲,他說:「我係阿Q精神,上年我辛苦,大家都辛苦,即係唔辛苦。由《狂舞派》到MIRROR隊長,自己轉變好大,細個時對事情反應好大,會忽略身邊人,踏足社會耐咗,知道人哋都緊要,嘗試理解人哋,自己成熟咗,脾氣都冇以前咁大。」

奶茶︰每吋都係錢

奶茶在首集曾經在觀塘排練對戲,她說:「觀塘對我嚟講生命力好重,有無窮無盡嘅潛能。」奶茶認同土地問題是香港代表性議題,沒有面對過就不算香港人,她說:「自己開咗跳舞室,好深感受,每吋都係錢,這就是香港!對我嚟講,可以租到一個好地方已經好好,因為呢幾年香港人都辛苦,唔係淨係呢一代人上車難,下一代都難,繼續做好自己。」

去年的疫情更令奶茶醒覺:「疫情令我個人更加貼地,我嘅理想更確實,疫情叫醒咗我,唔好淨係追夢,生活係要,疫情係我哋實現理想嘅培訓班,令我更踏實。作為自由身舞者,疫情係直接打落我身上,手停口停,冇地方跳舞,我教小朋友跳舞,要確保佢哋安全,逆境求生,轉網上進行,唔得就再諗;唔好(喺)呢段時間放棄自己理想,反而要更強,唔識就學到識,我仲逆巿開學校,學好去經營。」

三人行有默契

Lokman與奶茶相識已逾十年,奶茶說:「其實簡單一個呼吸,我哋已經有聯繫。」她講到身邊的劉小華在看完《狂舞派》後,要求拜師學舞,間接促成今次在續集的合作︰「小華天分好高,適合跳locking街舞,好有能量,佢亦花咗好多苦功。」同時間小華亦得到Lokman私授男士動作舞技的心得,可謂習兩家大成。

奶茶講到好友Lokman近年轉變很大,她笑說:「佢而家係MIRROR隊長,佢嘅努力獲得認同,好戥佢好開心,冇變嘅就係默契,夾舞嘅時候,似曾相識嘅感覺就會返嚟。」

12歲的小華不只當奶茶是舞蹈老師,亦視她為奶媽:「我睇《狂舞派》時大概4歲,當時入戲院睇優先場,謝票時見到奶茶姐姐同全部演員,發現街舞原來咁好睇,我就叫媽咪幫我報跳舞,問咗一年,終於遇到姐姐教我跳舞。佢哋兩位教得好好,如果學唔到跳舞,我本身一啲都唔識跳,姐姐由第一個動作開始教,真係發掘到自己啱做呢樣嘢,自己有目標,就係勁過佢哋。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner