最佳拍檔丨周星馳關心吳孟達彌留 一直追問病況

更新時間 (HKT): 2021.02.27 17:40

新增內容

吳孟達近日的肝癌情況今日急轉直下,家人都通知圈中好友及至親前來探望,達哥已進入彌留狀,田啟文(田雞)在醫院探望完到樓下接受傳媒訪問,他說:「而家達哥係彌留緊,計醫生講,應該仲有幾個鐘頭就會走。」問到太太及子女是否正在身邊陪伴?田雞續說:「佢太太同仔女、屋企人都喺度。」據悉達哥的昔日最佳拍檔周星馳亦一直非常關心達哥情況。田雞於下午5時16分證實,達哥已因病去世,享年70歲。

達哥有沒有交下甚麼未了心願?田雞說:「達哥之前完全唔知自己情況咁嚴重嘅,所以係冇交帶過任何嘢,佢諗住會康復同出院,再同大家見面嘅。」田雞指達哥手頭的工作都已完成:「佢知自己身體有事,完全停晒手上所有工作。」家人是否接受到達哥將要離開?田雞說:「我唔方便代表人哋屋企人去答呢個問題,相信冇一個人願意接受自己親人離開,仲要咁突然,我都覺得突然,咁耐落嚟,我自己希望佢會好番,始終都要面對現實,去到咁環境,只可以接受。」

此外,田雞謂有通知周星馳(星爺):「周生係知道,佢知道所有嘅嘢,全部每一個步驟,我有同佢講晒嘅,佢淨係問我而家嘅情況,頭先先知而家實際情況,正如我答大家佢仲有幾個鐘頭就會離開,啱啱同醫生傾完先知嘅事。」至於星爺可有托過他跟達哥轉說話,田雞說:「佢之前有講過有乜可以幫到手醫到佢嘅,估唔到病情變化咁快。」

網上流傳周星馳得悉昔日好友逝世消息,表示「吳孟達的病情來得快,走得急。他是我那麼多年的搭檔和老友,現在我還無法接受。」《蘋果》曾多次致電周星馳,可惜對方一直未有接聽電話,後來更轉為關機狀態。

派周文姬做代表探望

田雞表示今早開始陸陸續續有不同好友來見達哥最後一面,有些已走,有些仍在病房。田雞又說:「我認為而家再聯絡周星馳作用不大,周星馳姐姐有代表來看過,大家不應老是有甚麼事情都拉周星馳講,我唔希望大家焦點放錯位置。」

田雞已跟達哥家人討論後事,他說:「我哋有初步傾過吓,我會全權代表做呢件事,圈內人邊個願意幫手都得,香港會搞追思會。」田雞指達哥的經濟上沒有問題,他近年有儲蓄,其家人都不覺經濟上特別有問題。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner