舞台劇《新聞小花2》決不重演 梁祖堯直認憂「國安法」:冇人想坐監

更新時間 (HKT): 2021.02.27 12:16
(資料圖片)

2003年創辦風車草劇團、現年45歲舞台劇「劇帝」梁祖堯(阿祖),多年來跟不少藝人包括何韻詩、林一峰、王菀之等合作叫好又叫座的舞台劇。不過,去年梁祖堯與卓韻芝演出的《新聞小花的告白2白屋之夏》卻一波三折,多次因疫情延期之餘,11月公演中途慘被第四波疫情腰斬。梁祖堯為三月中風車草一連十五場的新劇《通菜街喪屍戰》接受《1圈圈星光背後》訪問,坦言新劇能否如期公演也是聽天尤命,「你睇疫情咁反覆,政府嘅防疫措施變化,而措拖係咪有成效,根本冇得估,無法自己掌握只能繼續積極綵排。」

對於上次大批風車草劇迷買了飛,卻未能欣賞《新聞小花》,問阿祖今次為何不重演該劇,他坦言與香港已實施「國安法」有關,他說:「首先籌備一齣劇要一年,去年演《新聞小花》前,新劇已埋好班定咗期;其次《新聞小花》延期後,當中好多人都有其他工作安排;仲有當中內容太敏感,坦白講係冇機會重做,因為創作呢個劇之前,國安法仲未過,當時我哋認為仍有空間反映社會唔同聲音或我哋認為對嘅事,但國安法過咗之後,幾時踩到條紅線,冇人知!冇人想坐監,為咗保障每一個創作單位嘅安全,亦唔會硬闖呢條紅線,亦唔會出該劇嘅影像產品同將演出放上網。」

觀眾秒殺最後一場門票

去年《新聞小花》被腰斬死線前,風車草加開周二日場,劇迷即時蜂擁秒殺門票,阿祖透露劇團台前幕後都被支持者感動爆喊,「當日係工作日、臨急全場要劃一票價、買票嘅人唔知自己坐喺邊,但第二日早上七點已有人排隊,好多人係射波請假嚟撐我哋。演員同幕後團隊都好感動,一來覺得香港人犀利,要支持一件事會搏老命;二來,大家以為香港人對社會關心係冷卻咗,但亦證明需要幫手時,香港人會行返出嚟。當日完騷,大家都喊到痴線,謝幕全場觀眾站立十分鐘固然令我哋喊,入到後台,每一個人都繼續爆喊,我們做舞台咁多年從未如此感動過。」

放棄移民留守香港

近兩年,社會急劇變化令香港再掀移民潮,阿祖不諱言從前也曾計劃過移民日本或台灣等地,但經歷過去兩三年,他反而打消移民念頭,決心留守香港。他說:「之前一直想移民京都或高雄等二線城巿,因為由細到大,我唔覺得香港關我事,九七年我入演藝,只知香港人等於搵錢,但過去數年,再加上去年去咗耕田,就發覺原來對呢片土地有連繫,只要大家肯食香港種出嚟嘅農作物,就可以保護呢啲田地。每個人嘅細微選擇,都可以改變社會,咁我就決定唔會走!」

至於新法例實施後,有否擔心舞台劇像電影圈般創作空間收窄,阿祖指劇場不如電影般多掣肘,「我認為白色恐怖對舞台冇影響,電影圈就會彌漫,因為投資太大要投資者支持;但舞台劇唔似電影,即使舞台乜都冇,搬自己屋企傢俬出嚟都可以做,我哋可以變咗智慧性搵窿捐。咁我哋就唔做太敏感嘅題材,或者用暗示、借代囉。呢啲事歷史上發生好多,就似捷克天鵝絨革命,就出咗好多出色嘅舞台劇,最出名嘅少年劇作家哈維爾,就寫咗好多暗示嘅劇本,最後更成咗捷克嘅總統。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner