同屆藝訓班同學丨鄧英敏讚達哥是高材生 周潤發祝福好友:一路好走

更新時間 (HKT): 2021.02.27 19:20

吳孟達今日因肝癌離世,享年70歲。達哥在1973年投考無綫第3期藝員訓練班,與周潤發、盧海鵬、鄧英敏、林嶺東等是同班同學,發哥今日回覆《蘋果》:「達哥一路好走!」鄧英敏則說:「如果老天要佢走,拖太耐仲辛苦,希望佢安息。達哥都可以同林嶺東(已故導演)天上再會,阿東開戲都要人啦!」

藝訓班為期一年,一班同學感情要好,鄧英敏說:「最醒梗係盧海鵬啦!跟住就係達哥,我哋一班同學最早入EYT《歡樂金宵》嘅就係佢哋兩個,之後先輪到我,鵬哥同達哥絕對係高材生!」他還憶起EYT年代一些往事:「嗰時我哋有一個項目叫『旅遊孖寶』,我哋兩個拍大概15分鐘一個劇,例如張保仔洞,裏面穿插一啲故仔,佢做上把,我做下把,佢做醒嗰個,我做渣嗰個,現實生活都一樣嘅,佢醒我好多。佢同星爺合作,星爺就做醒嗰個,佢做渣嗰個,梗係無所謂,邊個啱咪做邊個做。」

鄧英文透露過去與羅冠蘭、甄懋強、林嶺東等好友間中亦會約達哥一齊食飯,每次達哥都好客氣主動埋單,他說:「佢好客氣,每次都要請,但有次林嶺東就好唔開心話:『做乜要你請啫,AA制唔得嘅』,達哥就話:『得得得,食埋呢餐先唔好講咁多』,佢就123走去埋單。」問到達哥經濟有沒有問題,他說:「我睇報道,都知佢有段時間係好困難,但冇同我哋開口講,可能係同一個半個人講,報道都話發仔冇借錢,但有介紹工作畀佢,咁都係另一種做法。」

初出道時的任達華,曾在《新紮師師》系列飾演吳孟達的女婿,對於達哥離世,任達華表現傷痛:「達哥畀我哋香港同好多影迷製造好多深刻嘅回憶,佢嘅離世係演藝界一個損失,希望達哥一路走好,佢嗰種演繹方式,係我哋電影界無人所及,大家都好惋惜、好惋惜。」

----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner