曾志偉眼濕濕丨吳孟達臨終一刻瞪大眼畀反應 田雞遺憾:佢講到嘢時唔喺佢身邊

更新時間 (HKT): 2021.02.28 23:27

一代演藝泰斗吳孟達昨日不敵肝癌病逝,終年70歲。達哥從影48年,帶給幾代人好多歡樂,無綫今晚播出一小時節目懷緬,邀請與達哥相識多年好友麥鎮江、伍潤泉、甄懋強、羅冠蘭、吳麗珠、鄧英敏、商天娥、戴志偉、關禮傑、苑瓊丹、林子聰、王晶等做嘉賓,回顧以往與達哥合作的往事。

苑瓊丹表示從達哥身上學識跟別人相處,要互相尊重,「以前喺電視台同達哥拍一場戲,話佢拋妻棄子,佢追住我走出去,導演突然話難得兩位喜劇演員合作,不如搞啲嘢,建議我哋踎低講對白,我就:『吓』,達哥叫我踎低一齊做,之後問導演:『冇路人經過,會唔會好奇怪呢?』咁導演又建議我哋『之』字形咁行住路講,我就梗係人都癲,達哥又叫我唔好嘈,又試做一次,但佢問導演:『會唔會好耐冇交流?』導演又提出叫我鬧一句:『你個負心漢』跟住達哥要畀個誇張表情,達哥今次就同旁邊棵樹講:『你覺得有冇問題?』然後擰番轉同導演講:『佢話唔係幾好』。達哥係一個面對100個唔合理都會做嘅人,最多同你商量,會用嬉笑怒罵或四両撥千斤。佢至今喺演藝圈咁高地位,我諗番轉頭,點解我哋學唔到,真係好值得後輩去借鏡。」

田啟文遺憾太遲探達哥

《少林足球》中飾演「三師兄」的田啟文、與「六師兄」林子聰亦有分享與達哥相處的點滴,田雞更自責一直以為有更多時間可以探望達哥,怎料再見已在對方彌留一刻,田雞哽咽說:「我噚日喺醫院睇住佢走,我影響力比較大,到呢一刻仲未接受到佢離開。醫生話佢瞓住,聽到晒我哋講嘢,但畀唔到反應,一直閉緊雙眼,直到臨走一刻瞪大眼畀反應,跟住就走。我原本安排早啲去睇佢,但又唔想咁多媒體阻到佢,又怕疫情會帶病菌去醫院……佢講到嘢時唔喺佢身邊傾多啲偈,到佢畀唔到反應(我)先出現。」肥仔聰表示原本有新戲想找達哥演出,但當時達哥表示檔期已排到5月後:「當時佢覆短訊都喘晒氣,我有叫佢睇住身體,但佢鍾意拍嘢,仲話要未做過嘅角色先接。」

曾志偉講到眼濕濕

節目尾聲,剛升任做無綫副主席的曾志偉亦有現身,講到達哥曾沉淪賭海,見人就借錢,最終連監製都不敢起用他、朋友也不再資助他,最後達哥一度想過輕生,幸臨危立馬,重新做人。志偉講到眼濕濕:「我人生不停去分享,好想同大家講,係一個好正能量親身經歷嘅故仔.……當時連佢最好朋友都唔再幫佢,佢覺得人生無希望,人生去到盡頭,就喺城門水塘想檻隻腳落去,希望下世重新做人,會做個更好演員,要發揮畀人睇。嗰刻佢諗可能我下世做牛做馬做狗,我而家仲係人,點解我唔可以而家開始嚟過?之後佢就返咗TVB,同所有編劇導演講,我係一個唔一樣嘅吳孟達,之後佢入廠係唔會帶劇本,因為所有對白都由頭記到尾。」

吳孟達2014年已立遺囑

此外,田啟文接受傳媒訪問時透露達哥生前,知道自己身體不好,早而立下遺囑:「達哥喺2014年,有心臟衰竭時,已經知道人生無常,所以喺嗰個時候,已經立咗遺囑,所以外界亂傳話佢冇立係虛構,都係假嘅新聞,佢喺2014年已經立咗遺囑。」

談到有沒有跟周星馳聯絡,他就表示現在還未跟周星馳通過電話,因為忙着回覆媒體,不過他表示正在安排達哥的身後事。他說:「達哥嘅後事仲未安排,因為今天係星期日,噚日佢去得太突然,如果有啲常識嘅人都知道香港係有一啲程序,需要時間安排,所以到現階段係冇乜可以向大家公布。」

曾志偉心情仍未能平服說:「一講到達哥真係覺得『唉,又走咗個』,可以講話演藝界不可多得、買少見少嘅。呢種演員真係好難好難,唔知點去複製。一路講,達哥嘅畫面就會一個一個浮現出嚟,你就更加懷念佢,達哥嗰種待人接物,令你好難唔懷念佢。無論幕前同你對戲,定幕後收咗工同你食飯分享佢人生,佢係好豁達、樂觀嘅人,有佢嘅場面一定有笑聲,就算佢點唔舒服佢都唔會話畀你聽,佢會死頂。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner