沈卓盈孕期1日食足7餐唔知飽 老公24小時on call做外賣仔慰妻

更新時間 (HKT): 2021.02.28 06:00

沈卓盈前年與經營內衣生意的富商Calvin結婚,享受二人世界後於今年元旦報喜宣佈陀B,預產期在年中。即將加入人母行列,沈卓盈懷孕初期不足3個月時妊娠反應激烈,又暈、又嘔、又攰、又餓,再加上胃口不佳,令精神狀況極差,謝絕朋友見面,經慢慢摸索身體變化才適應。初孕時的沈卓盈當時正為開電視節目《五星級絲打II》開工,節目圍繞吃喝玩樂,無形中可大飽口福,試食變放肆食,從而輕鬆減壓。

沈卓盈現時胃口全受腹中BB影響,飲食習慣大改變:「之前好鍾意食甜品,會雙眼發光,而家冇興趣,好神奇,反而鍾意雜食,突然好鍾意食麵包、燒賣、pizza呢啲,胃口完全改變,平時唔鍾意食嘅就好鍾意食,BB會隨時on call你,畀反應你一定要食到某樣嘢,好難捉摸,而家深深感受到。」幸得貼心老公Calvin全天候服侍,沈卓盈一副冧樣:「最辛苦係佢,懷孕到而家,我想食乜佢即刻去買,試過凌晨5點,我瞓醒咗要食嘢,佢即刻出去買畀我食,好彩有老公照顧,身體唔舒服階段真係完全唔想出街。」並表示BB就是送給老公最好禮物。

突如其來的改變,胃口猶如黑洞,令老公Calvin不知所措,沈卓盈笑言:「最初時真係嚇親老公。平日我一啲都唔大食,嗰段時間一日食足7餐可能都唔止,未夠2個鐘就要食一餐,變化令我都唔習慣,經拿捏後開始少食多餐,過咗失控期。」兩夫妻早已知道BB性別,但暫時保持神秘:「有諗過搞baby shower,但要睇疫情情況,其實男女都冇所謂,最緊要健康,今次懷孕係我哋計劃之外,暫時未諗改名。」

沈卓盈與身邊幾位好姊妹陳凱琳、譚凱琪、龔嘉欣等組成「少婦聯盟」,前兩者已為人母,可以互相分享孕育心得。懷胎歷程接近一半,沈卓盈得天獨厚肥肚不肥身,愛美的她非常緊張身材變化:「之前都有嚴重肥腫較難掌握,控制體形方面好辛苦,過程中知道媽媽好偉大,個變化唔係你突然間接受到,都會有啲情緒,好多愁善感。我都同老公講,呢段時間你最好咩都聽晒我講,我唔知我嘅情緒會點,咁佢都好就我,孕期都好開心。」沈卓盈希望多影相記錄懷孕經過,並笑說:「之前太肥好少影相,冇自信心,呢啲就係媽媽心聲有苦自己知。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner