吳孟達病逝丨感激「三叔」一角成代表作 《新紮師兄》教訓學警要守紀律網民最buy

更新時間 (HKT): 2021.02.28 12:31

吳孟達昨日因肝癌離世,生前合作過的演藝界好友紛紛悼念,死訊令港台中影迷難過。達哥1973年加入TVB第3期藝員訓練班,昨日TVB亦將達哥的演出影輯成片段放到facebook悼念。

達哥與周潤發、盧海鵬是同期訓練班同學,畢業後主力做《歡樂今宵》(EYT),他在EYT訪問說,年輕時睇電視見到胡楓、曾江好紅,吸引自己報讀藝訓班:「我一直都未紅過,希望做到十分一咁紅。」他說加入 EYT約10年後,才開始專心轉型拍劇。達哥參演過的劇集很多,其中1976年與周潤發在《大江南北》有對手戲,其後憑1979年的《楚留香》胡鐵花一角受人注目,到1989年與周星馳合作的《他來自江湖》更是代表作。

昨日有網民細數達哥的經典對白,其中在1984年《新紮師兄》中演警校教官,教訓梁朝偉「學識三、兩下拳腳,就以為自己好叻。郁啲就用拳頭解決問題,第日出嚟做警察,俾支槍你咪可以四周圍打死人?」、「你自以為係英雄,你向所有嘢挑戰,第日你當差,一槍打死個阻街小販,你都會當自己係為民取害。」、「我哋唔係要訓練罪惡剋星,唔係要辣手神探,我哋要嘅係公僕,服從紀律、維護紀律嘅公僕。」

TVB曾經邀請達哥做台慶頒獎禮嘉賓,當時達哥說多謝有《賭俠》系列「三叔」等角色:「有一個好角色,令觀眾永遠都會記得你,好多謝佢(周星馳)叫我三叔。」頒獎前又說:「所以沒有小角色,只有小演員、好演員、大演員。」但自從健康出問題後,達哥對工作態度改觀,曾在訪問中提及:「自從病咗之後,覺得不外如是,我同其他人都一樣,既然唔係話窮到等開飯,平淡都過到生活,不如搵啲好啲、唔使咁勞累(嘅劇本),可以有多啲時間陪吓細路仔。」

TVB今晚亦會有特備節目悼念吳孟達,嘉賓包括同期同學鄧英敏、合作多年的王晶、林子聰等。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner