王晶被指聘外地人開工頂爛市 田啟文認曾有電影涉用黑工防不勝防

更新時間 (HKT): 2021.03.01 21:30

香港電影業工作者開工不足,處於水深火熱。《蘋果》收到讀者黃先生爆料指,有電影公司涉以六折價錢招聘外地勞工拍戲,質疑導演王晶及《喜愛夜蒲》系列監製伍健雄的電影公司有份參與。爆料人黃先生表示類似情況在本港並不罕見,職位由電影的三工︰機工、電工及道具工,到攝影師、副導演都有。大陸工作人員的日薪,只是港工的6成,以電工、道具公價1,230港元一工計算,大陸crew只要700多元。而較高職位的如攝影師,價錢約12萬到14萬不等,但聘用外地如馬來西亞等地的員工只要約6萬元。

行內疑有人走法律罅

黃先生指一般電影公司有兩種方法用外地勞工,他接受《蘋果》電話訪問表示︰「最簡單就係冒險請黑工,試過有套戲成crew人都係大陸勞工,同電影工作者總會投訴,佢哋先請返香港人。又試過有套戲李日朗做嘅,請咗班黑工,打去海關、警察投訴嚟拉人,最後都係冇告,不過電影公司知驚所以請返本地人開工。」他表示行內還有人疑走法律罅,以類似工程合約的形式,請外地勞工來港開工,黃先生說︰「王晶部《賭城風雲》請咗位馬來西亞籍副導演,人工平香港人一大截。位副導同我哋傾開,話其實好簡單,只要有電影公司證明,整份受聘合約,就可以嚟香港開工。情況好似《變型金剛》嚟香港取景,用返美國自己工作人員一樣,電影公司當部戲係外國片或者合拍片就可以同勞工處申請。」他表示類似情況在港屢見不鮮,亦曾向屬會反映,可惜仍未見改善。「其實大家都心知肚明,就算唔係違法都好,大陸人名正言順咁落嚟,遲早頂爛個市。」

《蘋果》向王晶公司查詢,發言人否認指控︰「公司好多年都冇喺香港拍戲,製作團隊都喺大陸,合拍片要喺大陸開工。記憶中最後一部香港取景應該係《鴨王》,《賭城風雲》係合拍片,主要喺大陸拍,澳門、香港都有拍少少,都成8年前,就算而家TVB劇都喺大陸拍,最近3年完全冇喺香港有拍攝工作。」根據合拍片條例,電影公司需要聘請一定人數大陸台前幕後員工。而《喜愛夜蒲》系列監製伍健雄同樣否認指控,他接受電話訪問時強調絕無其事︰「無,我哋港產片嚟,唔係合拍片,唔會請大陸工作人員。全部都係香港工作人員。」

田啟文承認有電影涉用黑工

香港電影工作者總會會長田啟文接受電話訪問,對於讀者指控業內有黑工及六折請大陸外勞時,他說︰「讀者嘅嘢應該分兩邊睇,打擊黑工總會係不違餘力,一般做法我哋會先求證係咪屬實,如果係嘅我哋會打電話舉報。」他承認讀者提到有李日朗主演電影涉嫌有非法外勞一事屬實,田啟文說︰「嗰套應該係《男極探射燈》,當時套戲喺深圳拍完,跟住拉隊嚟咗香港繼續拍。有會員同總會投訴套戲全部都係大陸crew,我打電話同佢哋了解,電影公司解釋話『會長,我哋拍幾日咋喎。』我話幾多日都好,你要用外勞就要依足程序申請。」由於電影公司沒有理會兼繼續開工,總會就通知警方到場,在土瓜灣拍攝現場發現大部份工作人員都是大陸人,但最後告不成,田啟文說︰「電影公司話班大陸人喺度睇拍戲喎,之後都請返香港人拍咗幾日,再返大陸拍。」他指大陸黑工在港打一兩日散工,確實防不勝防,但就不信有公司敢以身犯險,請黑工做全職,「因為係刑事,要坐監,應該冇人咁大膽。」被指聘用黑工的導演劉俊輝,《蘋果》曾致電向他查詢,他說︰「都係陳年歷史啦,唔好再提。嗰啲都係大陸朋友話要過嚟幫手,而且套戲有大陸資金,朋友嚟幫幾日,唔係黑工,啲人誤會咗。」

至於爆料者「投訴」王晶涉低薪請外勞開工,田啟文指「人哋依正手續申請,又無可厚非。」他補充指事件又引伸到香港電影業員工的人工「是否太貴」,田啟文認為行業是時候要反思:「請一位外籍員工,連申請同在港食住,都平過用一位香港人,要檢討我哋人工係咪冇競爭力。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner