劉心悠畫畫靠打天才波 臨摹失敗作安祖蓮娜慘變容祖兒

更新時間 (HKT): 2021.03.01 00:30

劉心悠入行16年,幾乎是緋聞絕緣體,但生活一點也不枯燥,皆因嗜好多元化,熱愛跑馬拉松,又喜歡繪畫、木雕,可謂動靜皆宜。「好多人都唔知道我識畫畫,我以前喺加拿大一間設計學校讀書,但未畢業就入咗娛樂圈,之後好少機會畫畫,但其實一向都鍾意,但就停咗好耐。」

能重拾畫筆,全因一個機會,心悠早前跟慈善機構合作,畫了一幅運用Tiffany色調的小象,由於作品逼真生動,曾有人提出想購買,心悠一臉欣悅說:「我真係唔識出價,或者應該以工時、加埋材料費……應該咁計啩?!」被取笑收費相宜,她即笑道:「我人工好貴㗎,呢幅最少畫咗8個鐘,但我一個鐘頭收幾萬,哈哈哈,人生真係冇賣過畫,但有人賞識,如果義賣就係有可能嘅。」

自認欠缺創作力

心悠越畫越起勁,早前返大陸工作,疫情關係被迫困在酒店14天,她又開始執起畫筆素描,「呢堆畫筆係由我學生時代開始收藏,我有唔同嘅筆頭,例如尖頭、平頭,份量多一啲出嚟嘅效果都唔同啲,我早排畫咗一幅法國女仔嘅畫,需要畫到好黑,原本以為8B鉛筆handle到,但竟然要進級到14B,用咗個幾鐘去畫。」對畫畫執着,心悠就連畫架都是自己親手製造,但就從來未在人前畫畫,原來她一直只是臨摹別人的作品或相片,未有真正創作。「我比較缺乏創作力,唔可以喺一張白色畫布上,鍾意畫乜就畫乜,所有嘢都要有規範。我都好羨慕能速寫嘅人,見你個樣,幾筆就可以畫到神情出嚟,真正表現到自信,我係好羨慕呢種畫風。」

網民認錯安祖蓮娜祖莉

原來心悠一直是靠打「天才波」,自學自畫,有成功也偶有失敗。她隨手翻開畫簿一頁,皺起眉頭說:「我原本想畫靚女,點知出嚟有人妖feel,我都唔怕畀大家知,因為做人都有好多失敗。另一幅我叫佢做『阿馬』,塊面太長,都係半失敗作品,搵日我就會的起心肝刷晒再畫過。」另外,原本一幅好滿意的作品,但竟然被網民將畫中的安祖蓮娜祖莉,誤認是容祖兒,讓她哭笑不得:「有少少傷心,早前post呢張相上網,有留言彈出嚟話似容祖兒,嘩,會唔會彈得太遠呀,你話唔似佢(安祖蓮娜)都可以接受,但話似第二個人,同話似人妖一樣(另一幅畫),點解我畫咗十幾個鐘都睇唔到係邊個呢?!」之後心悠好用心再觀察二人容貌,得出結論是:「我不停望住呢張相,邊度似呢?定係佢哋兩個真係有啲似樣,比較之下原來真係有啲似,個頭有啲似,化妝後都有啲似。」

心悠最近接演ViuTV的30集長劇《冥冥之中》,與郭羡妮、栢天男、蘇志威、潘燦良等合作,她直言又要放低畫畫一段時間,問到未來會否開畫展,她說:「我未到嗰個層次,但如果將來有機會,相信都係為慈善。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner