Ian陳卓賢否認為拍拖甩底新城頒獎禮:我冇逃避

更新時間 (HKT): 2021.03.02 20:27

MIRROR成員陳卓賢(Ian)自從跟港姐陳曉華(Hera)傳出緋聞,被指顧着跟女友盧慧敏(Amy Lo)拍拖而甩底新城頒獎禮,一直被指迴避傳媒疑不敢接受訪問。事隔兩個多月,今日Ian出席ViuTV音樂頒獎禮記者會,這亦是事件後他首度接受訪問,問到女友Amy Lo有否為他候選音樂獎項而打氣?Ian淡淡然說:「我同佢工作範圍都唔同,所以冇干涉對方,好少講工作。」對於甩底新城頒獎禮,相反姜濤就算父親患病入院仍堅持出席,Ian重申:「被影到相係頒獎禮嗰日,但冇因為拍拖而甩底新城頒獎禮,嗰日的確係因為家事而請假,每個人家庭狀況不同,唔能夠跟姜濤家事相提並論。」

對於被外界質疑迴避連串緋聞,Ian表示只是跟隨公司安排,他說:「我冇逃避,因為就算5年後我企返出來,大家都會問。」他承認是認識Hera,但報道指車中的男子並非他,他再解釋純粹是賣車給Hera,錢亦已經收取了,但未知對方是否已經辦好手續,他亦沒有留意Hera被他的fans抨擊,他覺得可能是fans錫自己才會這樣做。

另一方面,ViuTV親生仔MIRROR在公司首屆音樂頒獎禮中獲得多項提名,隊長Lokman難以預計MIRROR會否成為大贏家,但當然希望獎項越多越好。獲4項提名的姜濤則說:「多謝公司畀機會我,信心就一般,順其自然,自己會想拎組合獎多過個人獎,因為一齊攞獎會更加開心。」此外,提到金廣誠表示絕不介意MIRROR亮相大台音樂節目,Lokman說:「好耐之前都講過唔介意。」隊友Anson Kong和應說:「最想係去一廠,然後講句『交返畀一廠』。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner