陳積榮肺癌四期情況轉差 孫慧雪為好友再籌錢:醫藥費用晒要見步行步

更新時間 (HKT): 2021.03.02 21:45

前無綫藝員陳積榮(Jeff)在去年8月時突然拍片表示患上第四期肺癌,因為已經有擴散嘅迹象,醫生診斷後指最壞情況只剩低半年命,幸好Jeff得到家人、女友及身邊朋友支持,再加上獲有心人籌錢醫病,去年12月拍片表示已入到梅窩居住,雖然完成電療療程,但每日都要食標靶藥,稍後將會接受細胞免疫治療。

好友孫慧雪今日在社交平台出post,為Jeff再籌醫藥費:「喺呢度!好想懇請大家幫我一個忙!由我訓練班開始,已經認識咗15年嘅好朋友Jeff,驗出有第四期肺癌,佢唔煙、唔酒、冇不良嗜好、個人心地好、兼有夢想有理想!而家仲好年輕!佢好希望可以康復,但係醫療費已經用晒啦,好希望大家可以出小小力捐錢畀佢,就算係一封利是嘅錢都OK 㗎!我哋可以積小成多!希望大家可以幫手!」

結果有不少網民向Jeff伸出援手,阿雪亦逐一回覆感謝,對於好友目前的情況, 阿雪說:「其實佢經過第一階段嘅治療,食咗第一代嘅標靶藥同第一期嘅免疫治療,但係而家情況有啲擴散,而且啲經費又已經用晒,惟有係等轉第三代嘅標靶藥。」阿雪又表示Jeff的右手「唔係好郁到」:「我今日都見佢,情況比之前、瘦咗好多,胃口唔係咁好,仲猛咁喺度咳,因為冇經費,而家佢同屋企人只可以見步行步。」

《蘋果》今日致電Jeff,他表示今年1月開始,右邊膊頭郁唔到,連行路都有影響,基本上已經甚少做運動,身體情況開始轉差,他氣若游絲地說:「阿雪今日嚟探我,傾咗一陣偈,因為之前係咁咳,而家條氣差咗啲,把聲都未好番,個肚又咳到好痛,不過已經慢慢行得番,嚟緊應該會好啲。啲錢真係用晒,而且我又轉咗藥,但係嗰啲藥費政府暫時係唔包,要先做咗好多test,pass咗之後可能先可以claim到錢,而家食標靶藥一個月都要3、4萬蚊, 所以我嚟緊呢2日都拍條片,都希望可以籌一籌錢。」

在今年1月的生日前夕,Jeff在YouTube Channel開live更新近況,他表示在正日生日將會接受免疫治療,希望大家可以為自己打氣:「我今年生日特別平淡,冇乜嘢願望,只係希望快樂同活着。」當時因為天氣轉涼,所以甚少外出做運動,連氣管亦變得差,經常出現咳嗽:「我啱啱都做完檢查,我嘅肺嗰個位嘅size細咗啲,身上啲粒粒都少咗好多,不過右邊膊頭嘅關節位有少少病變,但係唔算係腫瘤。」Jeff又笑稱雖然發作的時候,痛得有點難受,但自己反而因禍得福,因為女友負擔所有工作,令他可以專心休息。

他續說:「當然隻手有陣時都痛到影響心情,我女朋友都有安慰我,叫我笑多啲,我都有聽吓音樂同祈禱,我都明白需要時間康復,不過點都好,希望大家可以幫我打打氣,都希望有病嘅朋友都一齊加油,早日康復!」

----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner