愛情篇丨鍾麗淇原諒舊愛梁榮忠偷食 讚老公內心好靚:我好幸福

更新時間 (HKT): 2021.03.02 00:30

鍾麗淇的老公Nardone Ruggero是中意混血兒,去年7月,兩人慶祝結婚十周年,她在社交網分享婚照,用英文甜蜜留言:「十年下來...還有幾十年!」

「當你唔搵嘅時候就搵到,好sweet嘅,諗唔到同你同年嘅人一齊,細個拍拖諗住年紀大啲會成熟啲,佢比我想像中好成熟,第一次見佢覺得好靚仔,冇諗到去結婚,當然想,但冇諗咁長遠。」兩人第一次約會,男友表現好親切好真,她感到好甜蜜。

讚老公好靚仔

兩人可算是一見鍾情,愛情故事細水長流,「我嘅愛情,識咗個同年嘅男仔,講嘢又好笑又靚仔,你都諗佢係咪花弗?老唔老實?記得嗰段時間,我同佢一齊好開心,有時唔好睇得太長遠,可能我啱啱停咗一段關係,發覺唔好諗得太多,佢𠱁得我開心,記得我同媽咪講,識咗個好靚仔嘅男仔,媽咪鼓勵我開心就得。」

兩人拍拖3年後拉埋天窗,結婚10年無風無浪,「真係冇喎,我哋有樣好共通,永遠一齊,大家關係好好,我哋10年冇拗撬,最多係我發脾氣走咗去。佢內心好靚,加上佢靚仔,我識到佢係好幸福,佢真係一個好細心好體貼嘅人、好爸爸,冇乜嘢要改。其實我之後先知,如果有特殊小朋友,離婚率係高好多,所以我同人講要做好自己,我唔可以同老公講:你要做一個好老公喎!佢就係佢。」

原諒舊愛梁榮忠

前度梁榮忠偷食出軌,兩人結束8年情,幸而那段傷痛,沒有留下不滅的陰霾,「記得我心態係發生咗呢件事,第一,我媽咪爹哋冇事,因為嗰排佢哋俾我影響得比較大;跟住我要做嘅嘢係盡量平靜,下一步點行大家唔知,我成日覺得,唔可以太記仇,以前發生嘅嘢要學習,令你更加做好而家嘅人,但你唔好太怪人,發生嘅事係冇可能改變到,坎坷冇可能改變,我係好快放低,放係唔係我唔理,嗰排情況係好混亂,平靜後一步一步咁去,慢慢搵番自己,做更加多嘅瑜伽,我覺得瑜伽真係畀到我方向,進修做好自己,跟住識咗我老公。所以我會覺得,總之你做好自己,你會好㗎,你永遠唔係逃避之前發生嘅事,係去學習。」

兩人分手後,十多年來沒機會再見,「不過真係完全冇hard feeling,有時家姐生日,佢都會send WhatsApp畀我。我會覺得一樣嘢,大家為大家好,你條路咁行,我條路咁行,唔好諗可以改啲乜嘢,it’s ok,最緊要係自己開唔開心,我而家選擇,我人生係咪開心,係為人定係為自己,嗰段時間係好大學習。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner