蘇施黃戒煙20年張國榮見證最後一口煙 向唐鶴德被迫食二手煙道歉

更新時間 (HKT): 2021.03.02 17:13
(網上截圖)

蘇施黃(阿蘇)有一好友最近因肺癌離世,近日她在其YouTube頻道《TALK蘇》分享其吸煙及戒煙史,透露好友張國榮(哥哥)見證她吸最後一口煙。

曾吸煙27年的阿蘇已經戒煙廿載,她笑指吸煙時不覺得自己臭,但戒煙後卻討厭別人的煙臭味,阿蘇說:「首先要向某啲人道歉,想當年我廿幾歲成日打麻雀,其中一個我成日同佢講辛苦你,唔好意思,我而家先知幾難頂,呢個係唐先生(唐鶴德),佢唔食煙,但係我哋成日打牌,兩、三枱10個有9個都食煙,唯一佢唔食煙,兩枱人不斷咁食煙,好似黃大仙咁香火鼎盛,唔食煙嘅佢真係想死。」

阿蘇回想30歲時睇醫生,醫生對她一席話:「你個肺好靚,完全唔似食煙嘅人,不過千祈唔好食煙超過30年,食得太耐,個肺會急轉直下。」阿蘇銘記此話,但直至出入醫院又轉食淡味煙,依然每日一包,無間斷做了27年煙民。

直至2000年,阿蘇希望做些有意義事情:「所以我喺1999年11月講畀全香港人聽,我要喺嚟緊生日當天戒煙,到2月16號,我就同我老友張國榮,喺麗晶酒店食我最後一支煙。去到夜晚10點幾我不停煙駁煙,到11點幾我嘆緊最後一支煙嘅時候,老友走埋嚟整熄我支煙話:『食埋呢支唔好食嘞!生日快樂!』嗰支就係我最後一支煙,當時唔覺得特別,大概過咗兩年後,覺得啲嘢好食咗,飲啖水都甜啲。」

阿蘇指戒煙數年後,去到撒哈拉沙漠參加馬拉松,發現自己肺部像紙袋,沒有彈性,肺活量不足,走路也追不到同行朋友,她忠告:「究竟你食煙幾時食夠呢?戒煙好似要人揻甩鍾意做嘅嘢,食到有一日你覺得夠就唔好食。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner