唐奕聰猝逝丨麥家瑜感激伯樂栽培 布志綸視對方為爸爸:好接受唔到

更新時間 (HKT): 2021.03.02 20:46
麥家瑜感激伯樂唐奕聰栽培 布志綸視對方為爸爸:好接受唔到

太極樂隊成員兼著名音樂監製唐奕聰(Gary Tong)今日突然猝逝,他為不少歌手擔任歌曲監製,其中更是麥家瑜(Keeva)的伯樂。Gary於2007年邀請她從加拿大回港發展,更親自擔任她的經理人,Keeva今日在社交平台悼念恩師,寫道:「非常謝謝你一直以來的栽培和鼓勵,我會永遠懷念你。天家再見Gary哥哥」,之後以短訊回覆《蘋果》,表示對恩師逝世感到好心痛:「失去咗一個帶我入行嘅恩師同一位好好嘅長輩,太突然接受唔到。同佢太多經歷,我喺喺加拿大返嚟香港乜都唔識,工作上教我好多嘢,生活上亦都好多照顧」Keeva指對方是好好的長輩,即使大家不再是藝人與經理人的關係,但Gary仍然繼續鼓勵和提點:「我啱啱開個YouTube Channel,佢仲話有咩要幫手出聲,之前仲話約埋一齊做運動。」

樂隊Mr.亦與Gary合作無間,直到Mr.成員各自發展,Gary仍然與各人感情要好。身為樂隊Mr.主音、現時作個人發展的布志綸(Alan)今日以電話回覆《蘋果》,他說:「音樂上,無論係Mr.同我自己,都一直有Gary Tong,我視佢為我音樂上嘅爸爸。我都係下午收到消息,而家仲冷靜緊,好接受唔到。因為疫情,我哋成日約唔到,但係腦海一直想新年後要搵佢,但係而家已經冇機會,呢樣嘢我好難受。我知佢身體一直唔舒服,因為佢比較勤力,造歌要捱夜,所以一直好操勞。知道佢近幾年身體差咗,所以一直都擔心佢。因為疫情好耐冇見,最後一次係上年,但係有保持電話聯絡,我冇特別問佢身體嘅嘢,呢個係好突然,以我所知,身邊嘅朋友噚日聯絡佢都完全冇事。」Alan表示未知後事安排,暫時不想打擾Gary家人。

Mr.成員黎澤恩(Ronny)及譚傑明(MJ)分別在社交平台發帖悼念。Ronny貼上全黑相片,以英文寫道:「Gary Sir,現在你終於可以與『哥哥』繼續在天堂玩音樂了。」逾30分鐘後,再貼上與Gary的合照:「You rocked my world master Gary. 」

MJ貼上Gary在錄音室小睡的黑白照,他寫道:「可能我呢世都唔會接受到,呢位我覺得係整個音樂界最好嘅人,今日離開咗我哋。如果當初無Gary,Mr. 樂隊嘅音樂唔會取得我哋曾經有嘅成就,我哋嘅音色唔會係咁,一直都係佢同我講: 『樂隊應該要有樂隊嘅模樣。』亦都係佢教我, 一首歌入面點樣拿捏平衡主流同另類, 令我對打後嘅製作獲益不淺。好多佢曾經同我講嘅嘢,當時我新,好多都無聽,到我而家大咗,畀意見後浪時,原來我講得最多嘅,就係當時Gary教我嘅嘢。Gary,我真係無同你講過,喺我心入面,我一直當你係我老師,好多謝你,多謝你為我哋,為我做過嘅一切, 你永遠永遠都會喺我嘅心入面。老師,一路好走!」

曾為太極搞騷的范振鋒說:「好sad,公司以前春茗都有邀請過佢嚟,講到彈琴,佢好有才華,對後輩真係好關顧,今日接到通知真係唔敢相信,好傷感。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner