黃明志感嘆香港文化坍縮 創作自由收窄唔關國安法事:係因為錢!

更新時間 (HKT): 2021.03.03 06:00

大馬創作鬼才黃明志多年來貫徹始終,除了惡搞之外亦時常透過創作歌曲、MV及電影諷刺時弊,身處台灣的他日前接受《蘋果》專訪,宣傳最新專輯《亞洲通才》及分享成長點滴。

黃明志曾發聲撐香港的逆權運動,其向偶像Beyond致敬的作品《我們的海闊天空(feat.富九)》MV中更出現催淚彈等反送中畫面。早前他又身穿寫上「FREEDOM TO LEAD」及印有昂山素姬頭像的T恤,為緬甸民主發聲。究竟敢言個性是從何而養成?他說:「之前好多人講我嚟到台灣先學到咩都敢講,其實唔係。我細個中學時候已經係咁,嗰啲校長、訓導都好憎我,因為我覺得唔啱就講出嚟。我記得台上唱歌時都rap好多歌,校長同訓導都唔係好鍾意。記得有次有位訓導企喺後台等我表演完,之後我每次演出前,佢都要睇我哋綵排,因為嗰次之後佢就驚咗,但之後我哋綵排同表演內容係唔同,我哋知道佢要睇,我係導演咪同啲組員講改吓劇情。」

對於香港自由度收窄,某程度令創作空間也受影響,黃明志說:「我以前係聽LMF、MP4嘅歌,嗰時係好自由。當我開始感覺到冇咁自由時唔係而家,唔係《國安法》,因為之前香港有好多導演、歌手,佢哋要去大陸搵錢,就好少唱呢啲歌,係佢哋自己限制自己,係因為錢,唔係因為《國安法》。第一次感覺到有限制係大概10年前,係因為因應大陸市場需求而開始,《國安法》係第二次。」他舉例指過去10年已很少人拍類似古惑仔、鬼故及三級片題材的電影,但他認為以上題材曾經是香港電影的特色。

換轉以觀眾或聽眾身份,黃明志坦言對香港的改變感到可惜,他說:「我咩歌都聽,好Pop、好Rock、好Hip Hop、好粗口同好斯文都聽,因為中文市場已經唔係好自由,同埋而家香港限制咁多,身為一個聽眾就覺得好可惜。」多年來大膽直言的創作風格,曾有不少人勸喻收斂,他說:「好多人咁講,但係我唔聽嘅,因為佢哋講嘅係市場。但我阿媽就話安全問題,我就有聽,市場我唔驚,安全問題我就有啲驚,你哋(香港)有《國安法》,我哋有《內安法》,係好耐好耐嘅一個法律,係英國人留低,但英國人已經改咗冇咗,但馬來西亞政府仲係有嘅,好奇怪,係一個冇法律嘅法律,佢哋要捉你就捉你。」曾為香港發聲,會否擔心下次入境香港時會遇到阻滯,甚至出現被拒問題?他說:「其實要睇吓有冇人做先,睇吓有冇先例。」

黃秋生因對現時香港感到陌生而移居台灣,黃明志卻因執導電影《你是豬》在大馬被人投訴而遭通緝滯留台灣。早前兩人在台灣相遇,黃明志苦笑指有種他鄉遇故知的感覺,他說:「好特別,好似兩個外國人喺嗰度見面,因為唔係我哋屋企,因為呢度(台灣)我冇屋企人,我諗佢(黃秋生)都冇,諗住約埋出嚟食啲嘢團圓,我都有約埋杜生(杜汶澤),但佢有親戚喺呢度(台灣)。」黃明志指馬來西亞人非常傳統,每年都非常重視團年飯,他說:「我都超過10年冇喺國外食團年飯,每一次無論幾忙都返去屋企一齊食,今次係好特別。媽咪今次唔畀我返,因為我被通緝,如果返去就要入拘留室,拘留室有疫情傳出嚟,入面冇人理你,你死你事,所以好危險,我嘅朋友、同事、阿媽都叫我唔可以返去,好危險。我等啲疫情冇咁嚴重,或者拘留所冇疫情先至返去。」現時逗留在台灣沒有任何工作計劃,首要處理的事是待疫情改善後,先返大馬跟警方處理好今次事宜,之後再回台灣繼續工作。

2013年起先後推出6張以「亞洲」作為主題的專輯,今次來到「亞洲」系列的最終章,他希望作一個完美的終結,於是萌生以「致敬」作主題,藉此專輯向亞洲的一個代表性年代致敬,專輯內收錄12首歌分別向黃秋生、Beyond、張學友、劉德華、郭富城、伍佰及羽毛球壇一哥李宗偉與林丹等致敬。黃明志表示香港80年代的樂壇正正是陪伴他成長,給予他們這一代歌手的一種養份,他說:「我開始聽流行曲就係四大天王,開始學樂器、學結他就係因為Beyond,大部份都係香港嘅(音樂)。」不少人都為廣東歌出心出力,黃明志也是其中一人,他說:「我住地方喺南部,嗰度係冇人講廣東話,但係我哋識聽同講少少,因為我哋電台、電視台都係講廣東話,同埋港劇同香港電影都係直接播廣東話,冇配國語,所以粵語歌曲同香港文化係對馬來西亞人影響好大。」

於台灣能自由自在地為新專輯及電影作宣傳,黃明志直認是享受的,但同時間馬來西亞方面也會不時監視着他一舉一動,他說:「今次我被通緝就係因為我嘅電影喺台灣上,冇喺馬來西亞上,但係馬來西亞有人去報警,所以都係一樣。我喺台灣做宣傳一定要貼海報,但係佢哋話我海報敏感,涉種族歧視,宣傳片有問題,話我宣傳種族歧視嘅嘢,其實我部電影係反種族歧視,係佢哋講我種族歧視,奇怪,佢哋都未睇過部電影。」黃明志查問香港現時播放電影的尺度有否被收窄,他希望電影《你是豬》能夠跟香港觀眾分享。問到有何說話跟香港fans講?他說:「我希望我仲可以去得到(香港),冇事囉可以返得到屋企,同埋電影、演唱會喺香港可以上。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner