追代言費反遭申訴 
莊韻澄上庭被放飛機動胎氣

更新時間 (HKT): 2021.03.04 02:00

莊韻澄(前名莊端兒)昨早挺着八個月巨肚,由老公陪同下現身西九龍法院,出席有關與海鮮店「點點鮮」代言被拖數,小額錢債審裁處的案件。原來兩周前雙方雖然於西九龍法院提訊時協議和解,不過和解前海鮮店曾一度向法庭提出反索償,而對方一直沒取消這宗案件,莊韻澄昨日惟有如期上庭,可惜遭對方放飛機。

望能安心生B

連日為官司頻撲上庭的莊韻澄坦言稍動胎氣︰「今次撲個空,其實個肚都唔係好舒服,都已經咁大個,又要成日去廁所,頭先喺法庭都去咗三、四次,有啲尷尬,加上個肚開始重,呢排出現抽筋同腳痹,好彩朋友介紹咗個按摩師令我紓緩咗。」她指十分期待小生命來臨︰「有啲緊張,噚日覆完診,BB六磅幾,希望佢健健康康。我想快啲解決單官司,安心生B同坐月。」

莊韻澄昨回覆《蘋果》時表示︰「我同海鮮店簽咗三年約,第一年合作愉快,直至第二年疫情,對方就將半年的酬金支付方式改為每個月的期票,我亦體諒,不過舊年11月至今年2月都彈咗票,我搵對方了解又聯絡唔到佢哋,惟有入稟小額錢債審裁處。對方曾反索償我7月至10月嘅酬金,話我冇履行代言人責任,但佢哋一直用緊我之前啲宣傳相,亦冇新工作指令畀我。上個月18號上庭時大家係心平氣和傾和解,27號打畀佢哋時都有覆,佢哋話最近好忙,要3月至會處理。因為上次法官將兩單案合併,對方冇取消,所以我又要走過嚟上庭。法官話海鮮店冇人應訊,就當佢哋放棄。」

對於海鮮店昨日放飛機,莊韻澄說︰「好無奈!其實咩事都可以解決,逃避冇用!最緊要大家溝通,我希望對方有誠意繼續和解,我都會再打去問,但唔想日日追咁煩,諗住隔多一個禮拜再問,睇吓佢哋想繼續和解定案件繼續落去,我都明白疫情下生意難做,但就算想提前解約都要溝通,之前想搵佢傾佢哋已讀不回,我先至訴諸法律,冇理由你唔畀代言費繼續用我啲宣傳相,大家好嚟好去,我都傾向和平解決。」

搵調解師協助

莊韻澄表示要待與海鮮店商討細節後,將和解書交給法庭︰「法庭都有啲調解師介紹,收費只需二百,今次我都會要求對方去調解中心,搞掂後我就會向法庭撤案,至於對方的反索償已被剔除。」

娛聞樂陪你走遍全球追星,即Like「娛果」FB 專頁!
BannerBanner