金燕玲2年前患子宮癌 上月確診患乳癌:唔難受但好驚

更新時間 (HKT): 2021.03.04 13:49

金燕玲在2019年3月自揭年初發現患子宮癌,當時完成手術需接受化療和電療,雖然抗癌路艱辛難捱,不但頭髮全甩,再加上化療的痛是「由骨痛出嚟」,一度令她生不如死,但她依然堅強面對,加上有身邊的朋友支持,最後抗癌成功。

近日金燕玲加入YouTuber行列,昨日她在新開的「金燕玲 隨心。隨興」上載了第一條短片,片中她表示今年過了一個頗特別的新年,因為與兩年前一樣,在農曆新年前發現自己又患癌症,今次不幸患上乳癌:「今次係我做拉筋嘅時候,突然摸到自己嘅左胸摸到一粒嘢,諗咗一晚之後,第二朝一早去問醫生可以點樣做,檢查完之後,要捱到年初五先證實自己有cancer。」

金燕玲坦言與其將來有機會在別人口中知道此事,所以倒不如由自己親自同大家講,「之前我嗰個cancer就呼籲大家要做身體檢查同一定要買保險,但係今次唔係透過檢查發現,而係自己摸到,所以對我嚟講,唔知係上天喺度保祐我,無端端畀我自己摸到呢一粒嘢而發現」。金燕玲表示目前已做手術:「雖然我係癌症,但係屬於1期B,割咗呢粒嘢之後,我唔需要切除個胸,但係一定要做電療,呢個喺未開刀之前已經知道,但係我覺得自己係好幸運。」

蘇施黃今日接受《蘋果》訪問表示金燕玲情況OK,感謝大家關心,蘇施黃續道:「有心!金小姐身體好,未知幾時做電療,起碼一個月後,現時OK!精神非常好,有出街去吓朋友屋企,今日就全日喺屋企休息。睇到佢facebook嗰張相,我唔係講笑,facebook嗰張相係上個星期五影,佢星期三做手術、星期四出院,星期五已經係呢個樣,當日就係約個朋友,因為大家約咗好耐,舊年又miss咗同呢位九十幾歲嘅Auntie食飯,Auntie每年都請我哋食一次蛇,所以我哋就出席。」

含淚分享患病經歷

金燕玲在片中坦言相隔兩年再度確診患上癌症,即使如何樂觀地抗癌,心情一定會有影響,所以當金燕玲分享患病經過時,她多次哽咽兼強忍眼淚:「首先我唔係難受,但係呢個經歷真係幾驚,點解呢?原因係個胸對女人嚟講係真係幾緊要,雖然見醫生嘅時候,佢覺得係樂觀,因為粒嘢唔係好大,而且睇片又好清,但係佢都會解釋畀你知,開完刀都拎去做化驗,萬一去咗其他地方……但係我好幸運,我係冇擴散,我入咗醫院兩晚,開完刀第二日就可以出院,噚晚返去休息,今日已經可以出街,你話係咪癲!」

呼籲得閒摸吓自己

金燕玲抹一抹眼淚再說:「真係呼籲大家,得閒無事去摸吓自己,我平日唔會刻意去摸,我都唔知點樣check,唔知生嘢嗰粒係乜嘢樣,我今次嘅經驗就話畀大家知,雖然我唔知有問題係乜嘢樣,但係嗰粒嘢平日係唔喺度,變咗一摸係『銀』住,嗰日個胸又好脹,所以係好明顯,當我再去化驗嘅時候,嗰粒嘢又唔係好明顯,所以一定要摸,知道自己有問題,就即刻去見醫生。」

金燕玲續說:「可能有啲人會覺得,哎吔,金燕玲有冇搞錯呀,又生cancer,係呀,我乜嘢都要打孖嚟,流感嘅時候有兩個流感;兩年後又有第二個cancer,但係我覺得自己係一個好幸福同好幸運嘅人,兩個cancer都係不幸中嘅大幸,所以如果真係可以幫到人,都希望分享啲資訊畀大家。」

千祈唔好當自己有病

今早金燕玲密友蘇施黃亦在社交平台貼了一張合照,相片是金燕玲接受手術後所影,相中她的精神不俗,實在很難相信她剛剛完成手術,阿蘇還說:「昨晚金小姐的新YouTube Channel 『金燕玲 隨心。隨興 』一出,有很多朋友及粉絲的慰問。金小姐叫我代感謝大家,佢真係好犀利的,做完手術第二日已出院,第三天已出街,佢話唔好當自己有病匿埋喺屋企喎!我做司機蘇,駕車也小心翼翼,費事揼親佢,衷心多謝大家關心!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner