陳少霞帶兩女住公屋貧病交加 再婚嫁富商改變人生

更新時間 (HKT): 2021.03.05 19:22

現年44歲的陳少霞在2016年,再婚嫁擁8億身家的63歲「法拉利之父」李文輝,婚後專心做少奶奶,前年誕下B女李書雅(Esther),不過陳少霞未遇到李文輝之前,在2000年曾與澳籍華裔商人閃婚並誕下兩女,但其後丈夫生意失敗破產,兩人於2008年離婚,而前夫在2012年因病逝世,當時她獨力照顧兩個女兒。

日前陳少霞接受好友馬浚偉的節目訪問,罕有地談到當年離婚的生活,她直認是人生最大挫折。在2006年,陳少霞前夫生意失敗致破產,她為了支持丈夫,不惜將全部儲蓄給對方以作支持,可惜最後離婚收場。陳少霞要復出幕前賺錢養家,卻不幸患上甲狀腺亢奮,大女亦有糖尿病,因經濟拮据要搬入天水圍公屋居住,重提往事,她說:「拍劇帶畀我嘅名利係好多,但做藝人係辛苦,我由一個經濟幾好嘅人,突然間變到乜嘢都冇晒,跌落嚟之後要照顧小朋友,嗰個階段係唔知自己點解會搞成咁,好茫然,明白原來搵工係咁艱難,因為以前咩都有人安排好晒,呢段日子唔易捱」。

試過人工受孕

幸好陳少霞性格樂觀又易滿足,為生計,她試過做地產,但不成功,最後轉行做珠寶,當中學到不少有關常識,最後得教會姊妹黎曉靈撮合,找到第二春。兩人於2016年結婚,婚後陳少霞很想為丈夫生B,曾嘗試人工受孕,可惜屢試不果,最終自然受孕,在42歲高齡誕下第三胎。陳少霞表示因細女只得15個月大,加上體力與心力有限,所以只能揀最重要嘅事情來做:「除咗傳福音之外,都想讀神學,我仲報咗中醫課程。」

當年陳少霞年因電影《哥哥的情人》出道,其後獲劉德華賞識簽約成為旗下藝人,接着再轉戰電視圈,馬浚偉問她有否遇到最低落時,陳少霞直言有好幾次感失落:「我諗都試過好幾次,第一次係拍電影同電視嗰段時間,其實我係冇讀過演藝課程,好多人以為我係讀演藝出身,但係我真係唔係,到咗拍第2、3部之後,內心好恐懼,知道唔係要做番自己,我先發現原來自己係唔識做戲,只不過係冇人發現,而家睇番嗰陣係有啲情緒問題,會收埋自己,結果搞到啲人誤解咗我,以為我好高竇,係一個冇承擔嘅人。」她續說:「嗰陣我10幾歲就入行,你諗吓嗰陣識啲乜嘢?睇到自己有咁多被批評嘅聲音,生活習慣又好唔同,令到我個人好迷惘,個人真係會驚到震,呢個可以話係我人生第一個大挑戰。」

無綫拍劇操到銅皮鐵骨

直到入了無線拍劇,總算填補了演戲這方面的不足:「因為拍電影嗰陣好驕矜,成日有好多人圍住,我真係唔係好慣,我本身性格男仔頭,所以入咗TVB之後,冇人服侍你,自己拎凳、化妝箱,操到自己銅皮鐵骨,不過呢個操練真係好好。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner