林作簽生死狀出戰拎百萬 鍾培生寸爆:好似小丑咁玩佢

更新時間 (HKT): 2021.03.05 18:36

仇人相見,分外眼紅,鍾培生和林作今日舉行「林鍾一戰」記招,火藥味甚濃,當林作提及想為拳賽找贊助商,鍾培生即寸爆「諗住幫佢搵殯儀館sponsor,但係我相信輪椅會好少少」,鍾培生全程狙擊林作,句句有骨、殺氣逼人!

約下午2時半開始,已有過百傳媒到場,大門設櫃台登記,需要填寫健康申報才可進入大宅,分別有4位女傭幫手為在場人士量體溫及唧消毒搓手液,穿過大門落樓梯後,赫見一個大擂台,四邊寫上「培生擂台」,氣派十足。

鍾培生在記者會多次用言語攻擊林作,而林作仍嬉皮笑臉應對,記者會完畢後林作和鍾培生站立合照,有傳媒要求二人握手,司儀指「今日唔會握手,互相對望就得」,兩人更作狀讓傳媒拍照。其後二人分開接受訪問。未上擂台,二人近日已展開多場口水舌戰,今日終於正式碰頭,鍾培生一見林作就嬲爆爆:「你哋望吓佢態度、衣着、髮型,成pat屎咁,冇可能唔燥,個個都想揼佢,你睇我平時都好nice,都係咁樣同大家傾偈。」

鍾培生:全力打佢個嘴

鍾培生稱現時已積極備戰,戒口不再做「肥仔培生」,揚言10秒內KO林作,「會慢慢折磨佢,因為佢好鍾意抽人水,全力打佢個嘴同埋佢body,用我嘅腳法對付佢,好似小丑咁玩佢,同佢平時一樣。」又謂林作即使投降都要看裁判決定,彼此要尊重拳賽,揚言「打X林作條仆街」。

鍾培生簽下生死狀,並說:「有咩好驚,我媽咪日日念經,話我哋鍾家做好多善事,叫我唔好打死人,仲叫我就住佢,但我唔會。好多人都想睇我點教訓佢,等佢知道做人態度係有代價,佢欺善怕惡,又曾經inbox鬧人窮、冇學識,呢啲係賤畜行為,我只係教訓小動物。」鍾培生又離奇說不排除邀請裕美表演,一切交由製作團隊磋商,但自己與林作之間則沒有和解空間,「叫佢學識返做個男人先,咁樣可以嘗試認識呢個人,但以佢人格冇乜好講」。

裕美買鍾培生贏

林作今日和媽媽一同到來,多次被鍾培生辱罵,林作說:「大家都睇死我,但我冇淆底,有1百萬就打硬,信心十拿九穩。」林作為今次比賽加大保險額,受益人當然是女友裕美,「媽咪咁有錢,不過今日嚟到呢度覺得自己原來好窮,返去要同阿媽檢討吓」,又指媽媽今日來食花生睇在1百萬份上,支持他出賽。

林作又誇口自己贏面六四比,單憑身高、體重及運動細胞估計比對方優勝,自稱有171cm,形容鍾培生只得167。林作指已簽生死狀,但沒有立遺囑,他笑言:「冇諗過會輸或者死,個畫面仲係贏時幫佢挽回升勢嘅場面。」不過有人開盤買這場拳擊賽,林作坦言媽媽和裕美都會買鍾培生,自己賠率等同美金是最好投資機會。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner