爆港星大陸檢疫騎呢事︱天王正哥要求專車被拒焗坐大巴 影后DD自備巨型床褥

更新時間 (HKT): 2021.03.05 06:00

武漢疫情令唔少香港藝人手停口停,留喺香港冇嘢撈,為生計惟有返大陸搵銀,近半年,就有近百香港藝人經深圳灣口岸進入大陸境內。

由香港入境,必須喺大陸接受強制檢疫,並由最初14日增加至現時21日,藝人通常為方便,都會貪近,揀喺深圳酒店檢疫,之後再去唔同省份開工。須知道,現時喺深圳,國際大品牌嘅酒店唔會做檢疫酒店,而大陸稍為似樣具規模嘅本地酒店,又寥寥可數,因為咁,平時食好住好嘅香港藝人就要出盡法寶搵門路,希望搵間四正少少嘅酒店落腳。不過藝人行走大陸,冇人事係好難成事,所以唔少人會拍膊頭走後門。最近大陸就有個酒店秘密網,爆出香港藝人喺大陸住檢疫酒店嘅秘聞同騎呢事,當中仲有唔少係一線巨星添!

天王正哥要求天王級待遇

疫情面前人人平等嘅大原則下,藝人同普通市民要上深圳,一律要喺深圳灣口岸過關,喺關口等關員隨機派你去指定嘅檢疫酒店,然後等專巴直接送你去呢間檢疫酒店住。由於係隨機冇得揀嘅關係,一班藝人擔心自己派到九流酒店,所以起行前就四出託人幫手。早排有個天王級藝人正哥,就私底下訂咗一間四正「星」級酒店,但由於佢唔想同普羅大眾齊齊逼大巴,未上大陸前,預先派助手打電話聯絡大陸相關單位負責官員,要求對方私底下喺當日派一架專車接送,仲叫對方預先寫定行程表畀佢,免得正哥喺關口等候,負責官員當然睬佢都傻,點知正哥助手竟然三番四次催佢交行程表,負責官員隨即喺電話拋咗句「我唔係XX粉絲嚟,冇必要幫佢!」然後cut線。結果,正哥當日焗住喺口岸等大巴,仲足足等咗4個鐘先上到車,等車嗰陣,為免俾人認得,正哥將自己由頭到腳包到冚,又係嗰句,面係人畀,架就……!

童顏老竇阿徐搵錯酒店

正如之前所講,由於深圳有質素嘅酒店,肯轉做防疫酒店嘅只得一、兩間,其中一間3星級酒店,已經成為香港藝人嘅「星」級酒店,所以個個爭崩頭,搞到房間數目緊張,童顏老竇阿徐個得力經理人原本託人走後門book咗呢間「星」級酒店,點知喺過關時,關口職員唔醒水,隨機派咗另一間畀阿徐,佢住落發覺酒店硬件軟件全部唔對路,後未先知原來住錯酒店,經理人惟有搵有力人士幫手聯絡「星」級酒店個老闆,酒店老闆為免得失有力人士,最後搵藉口要求其中一間房嘅「倒霉」住客退房,讓間房畀阿徐住。

爛玩視后丁姐打開房門任睇

話明隔離防疫,當然要遵守規則,不過近年喺大陸搵食嘅視后丁姐,就無視隔離令繼續我行我素,話說大陸酒店嘅冷氣通常係中央處理,住客係唔可以按照喜好去調校溫度,早排有幾日回暖,丁姐覺得間房翳焗,除咗要求酒店職員送風扇上房外,最離奇係佢竟然唔怕其他住客望見,長期打開房門散熱。雖然丁姐唔怕蝕底,不過同層住客擔心防疫問題,多次向酒店職員投訴,但丁姐一於少理,堅持自我,繼續中門大開。

好媽媽影后DD自備床褥

好媽媽影后DD早排日日留港湊細路,難得有客戶招手返大陸搵真銀,嗱嗱臨執行李北上,但點估到佢會自備埋一張king size床褥上去?搬運工人送床褥到酒店時,酒店職員當然say no,不過喺DD堅持下,酒店職員半推半就下,最終都送咗張床褥上房。除咗自備私家床褥,DD原來仲帶咗10幾20套睡衣北上,每次見佢玩抖音,十足睡衣fashsion show咁,DD仲將睡衣掛到成間房都係,情況就如萬國旗飄揚一樣,極之壯觀。

情歌王子甜爺晚晚爆咪

情歌王子甜爺喺90年代回流返港後憑一曲爆紅,早年同老婆北上搵食嘅佢,唔知係咪住慣獨立屋關係,佢竟然唔理其他住客,將酒店房變做K房,開大個喇叭狂操歌消磨時間,就連三更半夜都照樣大聲唱,擾人清夢。

愛國三打七虧虧偷運酒上房

愛國三打七虧虧當年喺香港撈唔掂,憑着一顆愛國心,索性返大陸打算東山再起。虧虧早排上大陸開劇,不過喺香港玩慣劈慣嘅佢,要留喺酒店房當然唔慣,為咗解悶,竟然唔理酒店要求客人不准帶酒上房嘅規定,將幾支紅酒用厚衫包喺行李篋打算運上房,以為神不知鬼不覺,結果俾酒店職員搜行李時發現,將紅酒悉數充公,等check out嗰日先可以攞返,虧虧曾經哀求酒店通融留一支半支酒,不過最終都係失敗收場。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner