兩年前子宮癌 上月發現左胸有硬塊 
金燕玲證患乳癌

更新時間 (HKT): 2021.03.05 02:00

金燕玲於前年3月自揭患上子宮癌,經歷半年治療康復。她近日開設YouTube頻道,前晚上載首段短片就自爆在農曆新年前發現自己患乳癌,她透露拉筋時突然摸到左胸有硬塊,看醫生後確診乳癌並要開刀做手術,將要接受電療治療,不過她慶幸及早發現,只屬初期。

現年66歲的金燕玲前年初不幸患子宮癌,要接受手術再化療和電療,抗癌路艱辛難捱,頭髮全甩,一度令她生不如死,但她依然堅強面對,並幸有密友蘇施黃及友人支持,最終抗癌成功,不過兩年後金燕玲再親自講述自己與癌魔搏鬥。前晚她於新開的個人YouTube頻道「金燕玲 隨心。隨興」上載首條短片,自揭患乳癌。她在短片中表示,今年過了一個頗特別的新年,因為她與兩年前一樣,在農曆年前發現患癌:「今次係我拉筋時,突然喺自己左胸摸到一粒嘢,諗咗一晚,第二朝一早去見醫生,捱到年初五先證實係cancer。」

金燕玲坦言與其在別人口中知道此事,不如自己親述︰「之前患癌我就呼籲大家要做身體檢查同買保險,但今次係自己摸到,唔知係咪上天保佑我,無端端畀我摸到呢一粒嘢而發現。」她指目前已做手術:「雖然係癌症,但係屬於1期B,割咗呢粒嘢同追蹤到兩粒前哨淋巴都割埋,但唔需要切除個胸,但一定要做電療,我覺得自己好幸運。」

開刀隔日即出院

相隔兩年再度患癌,金燕玲坦言即使如何樂觀心情一定受影響,她更多次哽咽:「首先我唔係難受,但係呢個經歷真係幾驚,點解呢?原因個胸對女人嚟講真係幾緊要,雖然醫生係樂觀,因為粒嘢唔係好大,但佢解釋開完刀拎去做化驗,萬一去咗其他地方……但係我好幸運,冇擴散,入咗醫院兩晚開完刀第二日就出院,噚晚返去休息,今日已經可以出街,你話係咪癲!」

金燕玲抹一抹眼淚再說:「真係呼籲大家,得閒冇事去摸吓自己,我今次嘅經驗就話畀大家知,雖然我唔知有問題係乜嘢樣,但係嗰粒嘢平日唔喺度,一摸係『哽』住,嗰日個胸又好脹,所以好明顯,當我再去化驗時,粒嘢又唔係好明顯,所以一定要摸,知道有問題即刻見醫生。」她續說:「可能有啲人會覺得『金燕玲有冇搞錯呀,又生cancer?』係呀,我乜嘢都要打孖嚟,流感嘅時候有兩個流感;兩年後又有第二個cancer,但我覺得自己係一個好幸福同好幸運嘅人,兩個cancer都係不幸中嘅大幸,所以如果幫到人,都希望分享資訊畀大家。」

一個月後做電療

金燕玲密友阿蘇昨日於fb貼出一張合照,見金燕玲精神不俗,難以相信她剛剛完成手術,阿蘇還留言:「金小姐的YouTube channel一出,很多朋友及粉絲的慰問。」阿蘇接受《蘋果》訪問時,指金燕玲情況OK:「有心!金小姐身體好,未知幾時做電療,起碼一個月後,現時OK!精神非常好,有去吓朋友屋企,今日就喺屋企休息。睇到佢fb嗰張相,我唔係講笑,佢星期三做手術、星期四出院,星期五就已經係呢個樣。當日係約咗個朋友,大家約咗好耐,上年又miss咗同呢位九十幾歲嘅auntie食飯,佢每年都請我哋食一次蛇,所以我哋就出席。」

娛聞樂陪你走遍全球追星,即Like「娛果」FB 專頁!
BannerBanner