梁祖堯預見「香港災難」 有思想冇真我:比喪屍更喪屍

更新時間 (HKT): 2021.03.05 00:30

過去幾年香港社會的改變,令梁祖堯(阿祖)徹底打消將移民定為人生目標的大計,近年跟香港連結一起後,令他更愛這片成長地。眼前所見的一切,啟發他首次自編自導自演舞台劇《通菜街喪屍戰》,起用喪屍為題,全因現在香港人雖然有自己思想,卻像喪屍一樣,不能活出自我。《喪屍戰》邀來《全民造星III》冠軍趙祥誠(Ben)飾演喪屍,盡展其陰暗一面。

梁祖堯與趙祥誠(Ben)日前於荃灣接受《蘋果》專訪,兩人將於下周三(10日)起假葵青劇院公演15場《喪屍戰》,阿祖坦言從小沉迷喪屍片,古今中外所有喪屍片都會看,心中想做名為「香港災難系列」的舞台劇,災難系列part 1是前年的《米線女戰士》,故事講述巨型颱風吹襲香港,連自由神像也吹到來,寓意自由終於來到香港,但只是得個頭,阿祖說:「我覺得而家香港人嘅生活好似活喺一個……即係我哋好似喪屍。我哋好似喪屍嘅原因,係好多嘢我哋都無得自己解決,雖然我哋好似有我哋嘅思想,但唔代表我哋可以用我哋思想做到任何嘢。喺戲入面,阿Ben飾演喪屍,但係未變成喪屍嘅人,其實佢哋生活係比喪屍仲更加喪屍。」

可以習慣不可接受

近年香港所發生的人和事,變成阿祖首次自編自導自演的動力,他說:「呢2、3年香港發展成個變化,令我從來未試過咁愛呢笪地方。我以前心願一直係移民,6、7年前係想快啲做嘢,快啲搵夠錢,然後去清邁、高雄或者京都,自從同呢個地方連結之後呢,我就徹底打消咗呢個念頭。」環境轉變之快,除了移民念頭消失,消失的還有另一套作品《新聞小花的告白2》

阿祖受訪前一晚,限聚令仍未放寬,他在旺角邊逛邊思考舞台劇事宜:「之後再去行吓模型舖,喺街食吓臭豆腐、飲珍珠奶茶,因為疫情關係只可以外賣到公園食牛肉飯,嗰一下覺得好幸福,係真心幸福,有種去咗旅行感覺,雖然而家個社會係一團糟,又要好似露宿者咁坐喺公園度食。呢個疫情帶畀我新嘅體驗,好似困喺屋企好耐,只要出一出嚟,原來會更加鍾意呢個地方。」阿祖強調可以習慣新生活模式,但絕不可以接受,因為總有些事令他感到憤怒,若果將眼前發生的事物變化視為必然,便會失去做人的稜角,沒有創作靈魂,身邊阿Ben說:「就變成喪屍。」

阿祖邀請是強心針

《造星III》的比賽過程,令阿祖與阿Ben建立深厚的信任感,自稱為「媽媽」的阿祖對學員們非常細心,正如受訪閒談時,阿祖會關心地問阿Ben最近有否再出現暈倒情況;當阿Ben教阿祖做蓮花手時,阿祖又給予鼓勵說:「你睇吓佢教人係另一種(有自信)聲線。」當初阿Ben未進行三十強比賽之前,已獲阿祖邀請演出,他的第一個反應是「點解係我?」,阿祖解釋是聽到阿Ben的志願想當恐怖片及喪屍片的演員,那一刻覺得大家志同道合。

獲阿祖邀請是一支強心針,還是一股壓力?阿Ben說:「強心針比較多,因為估唔到有人睇到我有嘅嘢。壓力係冇,因為嗰時(參賽)壓力大啲。」《通菜街喪屍戰》是阿Ben舞台劇處男作,他當初也細想自己是否能夠勝任,因本身毫無舞台劇演出經驗。

早前游學修與蕭若元的香港電影業激辯,游學修提出過電影、網片、電視劇的界線將會越來越難分,覺得網片有潛力培養到另一位天王巨星。不同範疇的表演平台,其實還有舞台劇,阿Ben自覺舞台劇是最適合自己行第一步,他說:「舞台劇現場觀眾感受會更加強烈啲,因為我無端端一上到台就有好多自己諗法出嚟,我可以豁出去做,甚至有時綵排我都未做到呢樣嘢。」

阿祖幫阿Ben引路

阿Ben在《造星III》時釋放出來的陰暗面令人印象深刻,是否因為發現到阿Ben這種特質適合演喪屍?阿祖覺得人的陰暗面無法刻意營造:「真正dark side係嚟自善良,dark side係成個光明裏面有點黑,然後嗰點黑暗突然間放到好大而被人見到,所以我覺得阿Ben表演出嚟嘅dark side係成立到,因為你平時知道佢唔係咁嘅人,陣味唔係咁,只要佢做少少,原來可以咁,後面仲有啲咁嘅嘢,就會覺得好好奇,好吸引。」

呢位「媽媽」在《造星III》之後,仍然上心照顧組仔,阿祖憶述第一次跟阿Ben的訓練是在排舞室內幻想行出人生,阿祖向阿Ben說:「其實我一路都冇問你,我記得完咗之後你坐喺門口喊咗好耐,有啲人喊嘅時候係好憤怒、好嬲,有啲人喊會覺得驚失去而喊,但係喺你嗰個喊係一啲傷害,一啲窿。當然之後我好明白,因為我都有呢啲傷害,係直覺嚟,然後好想特別搵辦法幫你補返個窿,因為你仲咁細個,有時嗰啲窿唔係自己一個人處理到。」

阿祖睇到阿Ben的各種「窿窿」,他說:「我同佢相處,認識佢嘅性格係鍾意攞嗰啲嘢出嚟講嘅人,我就好想幫佢黐好塊膠布。」他認為表演者如果能好好利用人生裏面這些經歷,將會成為創作上一大動力及泉源,亦會幫到其他人;如果不理會它,或者覺得不存在,最終不知會發酵變成甚麼,而阿祖就曾經試過不知變成甚麼而特別在意:「就唔忍心見到其他小朋友行返媽媽呢條舊路。」阿Ben覺得阿祖很懂得看人,在比賽時的心理訓練,慢慢對自己有所幫助,是有另一番意義在當中。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner