Anson Lo《大叔的愛》登神配 激咀Edan前除口氣:令佢feel good!

更新時間 (HKT): 2021.03.06 06:00

組合MIRROR成員盧瀚霆(Anson Lo)自出道以來,一直肯捱肯試,在音樂、演戲上下了不少苦功,早前獲派發樂壇成績表,他個人得到叱咤樂壇生力軍銅獎及十大中文金曲新人金獎,在喜悅背後,原來他承受無限壓力,不斷反問自己:「我仲show到啲咩畀人睇呢?」

Anson Lo早前在九龍灣接受《蘋果》專訪,對於獲獎得到大家認同,他開心之餘,壓力亦隨之降臨,「自己啱啱完成新人嗰一年,而家冇咗新人呢個title會更加壓力大,更加難捱,我好擔心攞完獎之後,我仲show到啲咩畀人睇呢?所以《EGO》呢首新歌對我意義好大。」父母的支持及提點,對他而言很重要,兒子得獎,父母倍感安慰,Anson Lo說:「我記得攞完叱咤樂壇生力軍銅獎,爹哋想攞個獎影相,但我同佢交接個獎嘅時候,佢就將個獎一嘢跌落地下,所以叱咤個獎係崩咗個角。」

最密集舞步演繹《EGO》

在新歌《EGO》之前,Anson Lo已推出4首單飛歌曲,今次跳唱快歌《EGO》力量澎湃,講述的是現今世代的網絡暴力和網絡欺凌現象,Anson Lo希望藉歌帶出訊息,就算作出批評都要尊重別人,不要人身攻擊令到他人難受,Anson Lo:「由《造星》到而家,我自己做每一個行為都有人鍾意同唔鍾意,好正常。」雖然被抨擊,但Anson Lo會關注別人對他在工作表現上的評論:「多數評論係我唱歌好唔好聽,做戲自唔自然,會唔會太chok。」

如果有睇過《EGO》MV,一定對Anson Lo滿身肌肉逼爆白色上衣一幕印象深刻,他透露為了MV準備了好多,他說:「我想呢首歌係最密集式、最難嘅舞步,我真係跳到嘔咁滯,喺食唔夠嘅情況下,仲要跳得咁勁,有一種缺氧嘅感覺。」原本拍攝當日Anson Lo打算空肚上陣keep住完美身形,最終太辛苦都要填肚,但只吃了清菜和雞蛋充飢。問到媽媽會否湯水伺候?Anson Lo笑指:「佢唔會喎,我阿媽對我要求好高,有時會睇我啲訪問,話我個樣好腫,叫我唔好食得多,咁呢方面,我會好配合。」

Edan陪住安心拍《大叔的愛》

MIRROR首張專輯《One And All》年初加印發售仍迅速賣斷市,有唱片店店主表示售罄速度驚人,是近年難得一見的瘋狂畫面,甚至炒高8倍至2,800元出售,Anson Lo衷心感謝fans支持:「我唔知有炒價,可能呢隻係我哋第一次正式嘅專輯,fans由《造星》追到而家,都等咗兩年幾,所以大家更加興奮,其實我哋真係諗都冇諗過。」

5首歌大約是一張大碟的一半數量,距離可以出個人實體碟又近了一步,Anson Lo亦帶點雀躍:「我又冇諗,但如果有都幾開心,因為係屬於自己!嗰種感覺就好似我出第一首歌《一所懸命》,我喺各大音樂平台見到自己個名,有個folder寫住Anson Lo盧瀚霆,撳入去有自己嘅歌,嗰種感覺係好奇妙,如果有實體碟,我諗呢種感覺會湧現返出嚟。」

除了跳唱外,Anson Lo在演戲上亦下了不少苦功,所以將來在MV上,會跟戲劇牽連上,希望能夠帶出另一面的Anson Lo,他亦幸運地遇上ViuTV劇集《男排女將》,給了他不少演戲經驗。最新一套劇是港版《大叔的愛》,Anson Lo會與Edan(呂爵安)組成「登神配」,連登更每日幫《大叔的愛》做開工日誌,神徒們明顯非常期待。

Anson Lo說獲邀拍攝這套劇,最初會擔心,但因為一個人又令自己冇咁緊張:「一套咁紅嘅劇,如果拍得唔好,會有種蒙羞嘅感覺,好大壓力,自己究竟能唔能夠駕馭到呢?因為我喺演戲方面都好green,所以更加驚;而家開拍咗,感覺冇當初咁緊張,因為有Edan(呂爵安)陪住。」

激吻前除臭:Edan冇咁做

Anson Lo與Edan分別飾演港版的牧凌太及春田創一,當然會有親熱鏡頭,但未有太尷尬的感覺,他笑說:「大家面對親熱鏡頭,都唔知點算,平時玩到幾癲都唔會咁樣玩,可能我哋想做得好,所以我哋拋開尷尬,豁出去啦!而浴室告白嗰幕係最經典,大家亦都會好期待。」問到會否有激吻?Anson Lo透露會有,不過答起來就有點尷尬,他更笑說要「尊重對手」,所以拍攝激吻戲前自己有先刷牙或者食香口膠:「就算本身冇乜味(口氣),我都會令佢feel good少少,佢更加需要咁做,但佢冇咁做。」

ViuTV翻拍《大叔的愛》的消息得到日本傳媒關注,朝日電視台甚至派員採訪港版記招,當地網民熱烈討論,結果又撻着Anson Lo的壓力mode:「緊張多過開心,當知道世界各地都咁鍾意呢套劇嘅原著,驚大家睇完有比較,對我哋嘅版本會失望,今次真係要畀足200%認真對待。」

由出道至今,Anson Lo已拍了超過40個廣告,他坦言人生目標是兩層樓,一層自住,一層給父母:「中學時候,我同我阿媽講將來大個,我要搬出去住,我阿媽就話未結婚都唔好搬出去,佢嘅原因係而家就算一齊住,但同佢哋都好少見,如果我仲搬出去,見面次數會更加少。所以佢話如果我有能力搬出去,佢哋要住喺我附近,不過我離置業目標係超級遠,努力工作先,我而家仲係一個事業衝刺期。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner