歐文傑籲謹守香港人崗位守護真相:政權就係想大家覺得無力

更新時間 (HKT): 2021.03.06 15:12

現年39歲的導演歐文傑,2007年投身電影圈,為《十年》五位導演之一。2017年歐文傑夥拍許學文及黃偉傑拍攝《樹大招風》橫掃金像獎成為最佳導演之一,豈料短短3年後,歐文傑因為《國安法》,決定隨妻子移民加拿大。

身處加拿大的歐文傑近日接受國際關係學者沈旭暉訪問,被問到今時今日變成「禁片」的《十年》當中對香港的預計,與今時今日的香港有何不同?歐文傑說道:「《十年》係咪禁片我都唔夠膽講,因為應該都仲有得喺香港播,比如Netflix上喺香港都仲睇到。其實當時《十年》上映嗰陣,啲人已經講緊唔係十年,佢哋話係『今年』。比如我主要係講語言上嘅問題,為咗搵食,香港好多人會傾向要小朋友講普通話好啲,呢啲情況喺當時,有好多人已經好清楚『已經係咁㗎啦!』不過你知香港人好忙,當時如果你唔係有小朋友或者唔係教育界嘅,可能唔係咁清楚原來嗰時已經有7成小學係普教中,你未必會意識到,仲會覺得離好遠。去到今日,當所有嘢都爆晒出嚟,大家都feel到痛。」

歐文傑又說道:「周冠威成日都話,今日睇返《自焚者》覺得好悲痛。可能我有啲悲觀,我覺得總之係會咁樣發生。譬如我個故仔(《方言》)入面講緊十年後,即係2025年,我應該同個主角(的士司機)一樣咁大,我個仔就好似佢個仔咁,十歲。最尾個結局都係講緊佢阻止唔到件事發生,佢只能繼續喺咁嘅環境下默默咁生活。我個人悲觀啲,我會諗到底係咪可以阻止到成個大環境咁樣走向呢?嗰陣宣傳成日都話,呢個係我哋5個唔想見到嘅將來,當刻成日都講話到底係為時已晚,定為時未晚呢?我覺得冇嘢係為時已晚,所有嘢其實自己都可以繼續做。件事係咁發生㗎喇,但將來香港條路點行就好睇每一個香港人點去繼續實踐自己。」

沈旭暉問到,如果當年已經預見到今日的香港,會否依然繼續支持抗爭?歐文傑表示:「我哋幾個導演發現一個好有趣嘅現象,原來歷史會不停重複,所以我唔敢講《十年》係預視,只係我哋發現原來歷史係咁樣重複,作為創作者,我哋只係將佢呈現返出嚟。就算知道咗喇,你選擇做定唔做?我覺得其實即係你認唔認命,雨傘(運動)我喺入面,反送中我都喺現場,我最大嘅感受係,你喺個歷史洪流入面,可能你明知有啲嘢會咁,明知你點尖叫點嗌都好,其實你都可能阻止唔到某啲嘢發生。藍營嘅朋友成日都話『你班人唔出嚟搞事咪冇事囉!』,但佢哋永遠都漏咗樣嘢,如果唔係因為林鄭『送中』,你係唔會有『反送中』,冇人會無啦啦走出嚟搞呢件事㗎!唔係有721,唔係有831,件事唔會搞到咁大,成件事個主導權根本喺個政權度,香港人係好被動。件事去到後期我覺得個政權直情係望住你嚟食,根本佢好想見到你某啲反應,然後專登去做啲好挑釁性嘅嘢,警暴啦、某啲官員接受訪問嘅態度啦,佢都係挑釁緊你,其實佢根本就係想要畫面。」

被問到今時今日,香港人仲可以做啲咩?歐文傑表示:「任何嘢你幾時都可以話冇得做,我諗今日香港人要做嘅嘢反而更加多,首先係要管理好自己嘅情緒,好似呢兩日又拉人啦,基本上佢哋做呢啲嘢好似想令你更加無力,我覺得個政權就係想大家覺得無力,無力你咪唔做嘢囉,咁就可以唔使搞咁多嘢。我哋喺海外其實可以發聲,好似羅冠聰就係不停令到海外政權或者不同人士知道香港發生咩事。當然你都可以乜都唔做,『冇用㗎啦』,係啊,你呢一刻的確冇可能話今日做一件事個政權就K.O咗,就好似1937年嘅德國,都想像唔到去到1945年二戰先完,我諗我哋就係類似嗰個時間嘅位置,甚至可能係我樂觀咗,我哋其實係處喺191X年都話唔定。我諗呢個係一個好漫長嘅過程,如果你諗住聽日就解決到件事,咁的確冇可能,我都會話算啦唔好諗。」

至於被問到身在加拿大的他可以如何幫助香港?歐文傑說:「每個人嘅崗位唔一樣,譬如我做電影嘅,我可以拍嘢、可以繼續創作去Keep住,或者最簡單係去聲援啊,譬如我接受訪問,其實都係希望有一個noise去延續落去。謹守崗位好緊要,當日點解我覺得《國安法》出現之後我冇得做?係因為我仲好想表達一啲嘢,好想發聲,但喺香港已經做唔到,我做嘅時候我可能被人拉咗,被人拉咗冇意義㗎嘛!就算你話『被人拉可以令其他人醒覺』,我覺得要醒嘅都已經醒咗,但我最大嘅作用就係不停拍嘢發聲,畀多啲無論藍營黃營,或者海外嘅朋友知道發生緊咩事,近年香港歷史嘅真相係點,我諗都好需要畀大家知。好似近年嘅雨革喺中國咪被改寫咗歷史,其實係一個三人成虎嘅故事,當一個政權佢有咁多資源做呢件事,我哋更加需要將我哋認知嘅真相保留。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner