吳孟達設靈丨胞弟指星爺同達哥一路好Friend 吳利達:每位入嚟都好傷心

更新時間 (HKT): 2021.03.07 18:16

資深演員吳孟達在演藝圈貢獻大,他上月27日因肝癌離世,享年71歲。達哥患病留院期間,田啟文(田雞)全程關注慰問,還代媒體跟達哥家人溝通,田雞更協助遺孀搞達哥後事,他今午近3時到紅磡世界殯儀館打點,大約5時許,田雞陪同達哥胞弟吳利達到門外接受傳媒訪問。吳利達說:「我唔習慣面對傳媒,希望我到時有咩講錯,你哋唔好見怪,感謝各位傳媒咁多年對我哥哥愛護同關注,我以哥哥為榮,佢對家庭照顧,對父母嘅孝順,對兄弟關懷,好朋友個個都對佢讚不絕口,所以屋企人個個都以佢為榜樣,好多謝各位。」

問到達哥年邁母親今日可有到靈堂?吳利達說:「媽媽今日冇嚟,囝囝囡囡嚟唔晒。」田雞補充有些要工作及隔離未能出席。對於周星馳前來致祭,吳利達續說:「一般慰問,星爺同達哥一路好friend,我哥哥有講過呢啲,佢係話同星爺一路好friend,各位我所知係咁多。」問到星爺在靈堂致祭時表現,吳利達透露:「我諗每一位入到去都係好唔開心、好傷心。」再問到星爺有無見達哥最後一面?吳利達指自己可能掛一漏萬,沒有看清楚,所以不知道星爺有無去見達哥。

生前最唔放心媽咪

吳利達謂不希望再有不快報道出現,他說:「又話佢經濟有問題,又話分家產,其實哥哥一早分配好晒。」達哥還有甚麼遺願?吳利達說:「佢冇講,因為好突然, 我哋喺醫院都陪咗佢好耐,佢喺醫院好樂觀,諗住會出到嚟,但呢樣嘢好多人都估唔到咁快,朋友都估唔到佢突然咁快過身。」吳利達指達哥:「佢生前最唔放心主要係家庭同媽咪,佢好孝順,最後媽咪有去。」

吳利達指當達哥彌留時,就帶了吳母到醫院,吳利達說:「最後一日有去睇佢,其實我一路有問過佢幾次,帶媽咪嚟睇你好唔好?佢就話唔好,因為唔想媽咪見到自己咁辛苦會傷心,事實上我對住佢成個幾月,我都覺得好辛苦。」講到這裏吳利達開始哽咽:「我哋都唔想見到佢咁樣嘅情形,但係我哋喺最後嗰一日,醫院通知我哋嘅時候,我哋都冇辦法喇,一定要帶媽咪去見一見佢㗎喇,呢個咁孝順嘅人,如果見唔到媽咪最後一面,對佢嚟講都有一個遺憾。」講到達哥的骨灰安放,吳利達表示:「呢個係佢喺醫院同我提過嘅,係佢嘅願望嚟,去返馬來西亞嗰邊陪太太同仔女。」是否已安排了安葬地方?吳利達答:「我諗呢個佢哋再安排啦,我又唔係好熟馬來西亞。」

田雞呼籲網上悼念

吳利達談到亡兄生前工作,他說:「佢係好熱誠㗎,佢一講到工作呢就好興奮。」不過,對於早前林子聰(肥仔聰)指達哥尚有3部片約一事,吳利達指不知詳情,田雞亦指達哥有很多片約,吳利達說:「其實係好多已經搵咗佢拍,但佢因為有段時間身體有啲問題……其實,呢段時間返大陸,都係還返啲人情畀人哋,即係人哋叫咗佢好耐喇,佢都要還返啲人情,其實佢諗住做埋今次就休息吓,休息多啲,即係人算不如天算。」吳利達最後補充稱:「我哋都希望回復返我哋平靜嘅生活。」最後他代表家人向傳媒致謝,還給傳媒送上蛋糕茶點。

田雞對達哥非常有心,他今早都在FB悼念達哥:「終於來到3月7日了,達哥走了至今,除了回覆各地媒體的關心、採訪、慰問!每天想着如何為今天的出殯奔走!今天晚上7點半至8點半,將舉行達哥的安息禮,因疫情原因,各地友好不能親來致念,在此建議各位有心人,用自己的方式,於19:30至20:30期間,為達哥及其家人送上祝福。代達哥家人感謝各方好友的關切之情。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner