吳孟達設靈丨鄧英敏憶與達哥、周潤發裸泳 達哥賭馬贏錢請鋸扒

更新時間 (HKT): 2021.03.07 19:47

資深藝人吳孟達上月27日肝癌離世,享年71歲,今日在世界殯儀館設靈。與達哥是第三期藝訓班同學的鄧英敏、潘先琪、伍潤泉、甄懋強、陳敢權及麥振江,以及一班無綫舊同事包括:杜琪峯、梁小冰和陳嘉輝夫婦、盧敏儀和孫敬安夫婦、夏雨、駱應鈞夫婦等,今日到靈堂致祭。鄧英敏受訪時回憶與達哥過往的點滴,他指當年讀藝訓班時,就試過與達哥、林嶺東、周潤發及伍潤泉,在晚上去到屯門一間學校游水:「因為同管理員、救生員相熟,加上係夜晚,我哋大家就提議『不如裸泳囉!』剝晒衫褲剝晒鞋,冇所謂,玩咋嘛,有啲人去到沙灘都想放縱吓自己,又冇人見到……呢啲都係歡樂嘅點滴。」

鄧英敏又指達哥是教自己猜枚的人,他讚對方反應快,是猜枚界的No.1:「《歡樂今宵》班同事都叻,羅浩楷、夏雨、關聰都係猜枚高手,我只係同佢玩吓十五二十,猜枚唔夠佢猜。」而鄧英敏又謂達哥試過幾次賭馬贏幾十萬:「佢係好鍾意賽馬運動,有時喺大陸做緊嘢,得嘅佢就『蛇』返嚟,同導演攞幾日假。返嚟同班同學食親飯,佢都會做老大『萬歲』,之後又會帶我哋去一間酒店扒房招呼我哋,可能馬場賺到啲錢,手鬆啲啦,佢平時份人都好慷慨。」

達哥趁Re-U豪派鮑魚

鄧英敏指達哥離開TVB後,兩人一直有保持聯絡,至於是否知道達哥的病情,他說:「知嘅,譬如早期嘅心臟病,大家都知,報紙都賣晒,我都有同佢喺觀塘食過一、兩次飯。」他又指達哥為人大方,曾試過在藝訓班搞的周年晚會中,送出過百隻鮑魚:「嗰輪佢同啲朋友夾份經營一啲鮑魚嘅生意,適逢嗰次係我哋第三、四期,我哋搞咗一個相識相遇40周年嘅晚會,喺杜琪峯個寫字樓開party食飯,佢就送咗百幾隻四頭鮑魚畀我哋,每人一隻,甚至我哋有另一個同學咁啱做完手術,嗰晚喺現場唔想食,達哥都特別另外用個盒裝起佢,叫佢攞返去,佢就係一個咁樣嘅好兄弟。」

被問到有甚麼想跟達哥講,鄧英敏指:「因為我哋2018年年尾,林嶺東大導演被老天爺叫咗上天,佢而家喺上面都開緊戲嘅,達哥上到去更加好,熱鬧啦,相信一定有角色預咗畀達哥,大家兩個師兄弟又可以擦吓火花!我已經叫達哥同阿東留返啲角色畀我,遲啲到我上去㗎喇,大家又可以見吓面。其實都冇嘢嘅,我哋嘅肉體死咗啫,個靈魂都係平行宇宙咁,可以穿梭嘅。」

憶述最後一次見到達哥,鄧英敏指已是兩年多前的事:「最後一次我哋都係喺觀塘約埋一齊,同埋艾威、蝦嫂(關海山太太)飲茶,嗰次之後我哋有通電話,有時耐唔中都問候吓佢。有時我知道佢返咗嚟,不過又匆匆忙忙,佢又有自己嘅朋友活動,又玩吓馬仔咁,我又唔識賭,變咗又唔會喺馬場見到佢,否則問佢攞啲貼士都好吖!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner