當粉絲阿四 買嘢唔還錢 
江嘉敏遭狂插貪心雙面人

更新時間 (HKT): 2021.03.07 02:00

江嘉敏是非不斷,雖有電競公司高層男友Anthony,但被指貪錢愛收兵。去年她與好姊妹馮盈盈上富豪船P決裂後,又遭男友老死X先生踢爆她偷食並要求送100份「手信」,早前再被指開網站疑賣贈品賺錢扮環保。昨日江嘉敏遭前粉絲在連登出post力數她多宗罪,包括EQ低、寸寸貢、貪心、高竇、態度差、攞着數及當粉絲如下人等。

死雞撐飯蓋

該名爆料前粉絲以「入咗Fans club先知江嘉敏係有幾黑暗」為題,打長文鬧爆江嘉敏。他先叫江嘉敏「見到咁多粉絲走晒就檢討吓」,指對方經常死雞撐飯蓋,「從來唔覺得自己有問題」、「有咩事剩係識不斷辯駁,將責任推向別人」,大罵江嘉敏貪心又EQ低,更指她原形畢露︰「唔好俾我知你真係去到邊都想攞人着數,叫你買嘢又唔還返錢畀人。」

手信擺一年

前粉絲最激氣的是江嘉敏當粉絲是下人,還上載三張疑似江嘉敏叫粉絲幫忙買台灣手信送去機場的對話截圖,指江嘉敏要求買兩打不同款的三文治,但航班提早卻沒預先通知,最後粉絲坐的士趕到機場,江嘉敏已飛走︰「幫佢買完又唔講幾時交收,雖然都係食物,唔係啲咩貴價嘢,但𠵱個係基本禮貌。」又指她試過一齊gathering,但完全沒有幫手set場,走時沒有講再見;送給粉絲的英國手信原來已放了一年,還找其他人代派,不是親手送。

另一名網民加入戰團,暗示江嘉敏是雙面人,「早兩年賣衫,佢試過𢱑sponsor,呢頭同你笑晒口,轉頭就同第二個講是講非,多多意見!」前粉絲又上載一張對話截圖,指江嘉敏派代表在粉絲group問「有冇人做氣球生意」,大家沒有回應,但到江嘉敏和男友生日,會場都恰巧地放滿氣球佈置,疑似成功攞着數。

對於被開post數臭,江嘉敏昨日回覆傳媒時表示:「唔係真嘅嘢唔會回應,我相信我啲fans唔會咁講嘢,最近太多假account同打手,所以我都delete咗同block咗幾千個假account(Ig)。」

娛聞樂陪你走遍全球追星,即Like「娛果」FB 專頁!
BannerBanner