阿肥@LMF指港台抽訪問「其實冇影響」 諷空降處長李百全得啖笑

更新時間 (HKT): 2021.03.07 11:50

零傳媒經驗的民政事務局副秘書長李百全空降接任廣播處長,早前被《蘋果》率先爆出上任僅4天已「大發官威」,要求全部節目須由他本人過目,其中節目《香港故事》原定訪問香港樂隊LMF(大懶堂),卻被李百全指不夠decent,又形容LMF有極端政治取態,經常唱粗口歌,更直指成首歌「全部都係器官」,更反問「點解唔搵曹永廉做訪問?」

LMF成員阿肥(Phat)早前在IG開live,提及此事時阿肥表示得啖笑:「呢個世界好癲,可能會再癲啲,我哋諗唔到有幾癲、有幾邪惡,我哋唔係佢嘅心,唔係佢咁諗嘢。我哋呢啲咁唔decent嘅樂隊,港台節目抽起咗,其實冇咩影響。我覺得好笑嘅係一個冇讀過新聞、冇做過傳媒機構嘅人,空降做咗處長,然後嗰個禮拜嘅節目畀佢睇過先可以出街。」

阿肥認為,比起已習慣冇人播的LMF來說,世界上發生的事更叫他感到無奈:「反正我哋嘅歌冇電台、冇電視台會播,其實一直以嚟都冇播過,有咩所謂?相比起嗰15個人本來可以保釋,然後律政處上訴立刻要佢哋還柙呢件事,佢哋嚴重好多。緬甸亦都好黐線,開真槍,殺人!殺平民!殺年輕人!相比起呢啲事,我哋嗰啲唔值得提,個世界黐X咗線!基本上連粗口都表達唔到,好多嘅無奈、無語,講唔到!」

阿肥表示由細到大父母、老師都教導他要做好人,最緊要有良心、有公義,千祈唔好做壞事,「我哋睇佢哋日日做壞事,佢哋唔驚㗎喎!做咁多壞事喪盡天良,諗盡辦法害佢哋,唔驚㗎咩?唔怕有報應?地上行走係俾魔鬼統治,但係就可以咁嘅咩...都係嗰句啦,就算佢哋唔信有報應都好,我信。做壞事嘅人係一定有報應!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁