電影製片人趙美寶腸癌離世 劉錫賢透露走得安詳

更新時間 (HKT): 2021.03.07 19:48

亞視前藝人趙美寶今日下午於屯門醫院離世。趙美寶80年代起已加入電影投資行列,並擔任經理人,魯振順曾是旗下藝人。近年有投資抗毒電影《毒禍》系列,其中《毒禍2》由廖啟智、江美儀演出。88歲黃夏蕙表示跟寶姨相識約60年,她說:「佢兩年前患咗腸癌,醫生叫佢做手術,佢唔割,要睇中醫。平時我日日同佢通電話,3日冇電話我就知出事,又走一個好朋友,好傷感。」

近日喪母的劉錫賢今午在facebook公佈趙美寶離世消息,他今日回應《蘋果》時說:「寶姨係一個我好尊敬、好錫我嘅前輩,大家又係好朋友,20幾年前佢邀請我拍電影《尖東雙虎》結緣。」

劉錫賢形容趙美寶熱心慈善,多次邀請出席慈善活動,惟疫情後一直未有見面:「佢早前都有打電話問候我生活過成點,去年疫情冇咁嚴峻時有一齊飲茶見過幾面,跟住就只係通電話。我知佢有癌病,但估唔到走得咁突然,我心裏點都有啲戚戚然,呢排好多唔好消息,我媽咪走咗,今日又去唔到達哥嗰度,咁多唔好消息非常痛心。但我知道寶姨走得好安詳、冇痛苦,希望佢喺天國開心快活咁過,早登極樂,一路好走。」魏秋樺跟寶姨都曾是亞視之友,她今日短訊回應寶姨死訊:「已收到消息,難過。這世界最近不知怎樣了,那麼多認識的朋友走了,好傷心,好灰。」

陳靖允接到寶姨死訊都很傷心,她說:「今午我聽到呢個消息都好唔開心,近日好多人走。寶姨以前有叫過我做一啲騷,大約兩個月前,我同佢喺元朗飲茶,當時佢狀況仲好哋哋,我知佢有病,佢仲用自然療法,一路都好穩定,早前夏蕙姨搞生日,仲叫我邀請寶姨,但寶姨就冇出席。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner