陳積榮癌細胞擴散摧毀生活 願與病魔共存換回基本活動能力

更新時間 (HKT): 2021.03.07 00:00

前TVB藝員陳積榮(Jeff)去年8月確診患上第四期肺癌,面對龐大醫療費用,Jeff拍片親述身體狀況,並獲不少有心人籌集約80萬醫藥費。經過電療、第一代標靶藥及第一期免疫治療,情況曾經好轉,本身約5厘米的腫瘤縮細了三分之一。個性積極正面的Jeff不時拍片分享近況,但自今年1月12日38歲生日後,短片數量減少,直至本月2日,Jeff好友孫慧雪透過IG出post,再次為Jeff籌醫藥費。

上周四(4日)《蘋果》去到Jeff哥哥——著名武術指導陳中泰,位於西貢井欄樹的寓所探訪,相比起半年前受訪時,Jeff明顯消瘦了,不時咳嗽,要彎曲身體靠着梳化坐。

由於Jeff剛接受了中醫師按摩,令他比較氣促,當女友遞上暖水給他飲後,Jeff抖擻精神便慢慢道出身體近況。他指今年1月開始右肩膊因為痛楚而影響右手郁動,連之前一直做的氣功及運動也受影響而暫停,他聲線柔弱慢慢說:「換言之,我自己感覺身體狀況跌得好快、差得好快,1月時照到右邊肩胛位有癌細胞,1月尾完成化療,活動能力有好轉,但仍然比之前差。最近摸到右邊膊頭近淋巴位置有粒嘢乒乓波咁大,中醫師話按吓佢,如果係淋巴發炎就會細返,如果唔得先再自費去抽組織驗。」

轉第三代標靶藥使費重

膊頭發現癌細胞擴散同時,另一件困擾他的事又發生——Jeff開始咳嗽,他說:「我本身冇痰同傷風症狀,可能係腫瘤影響,最嚴重時咳到見血。喺政府醫院再照肺片時,發現腫瘤比之前擴大,而家有7至8厘米大,醫生都話情況令人擔心,建議我轉食第三代標靶藥,但要經過檢查證明第一代標靶藥對我無效,政府先能夠資助第三代標靶藥,而政府已經安排我3月尾檢查。」

但Jeff自覺情況比較危急,迫於無奈決定在上月起,先自己支付每月4萬元的第三代標靶藥費用,他說:「當時咳得太利害,咳到內臟都抽埋一舊。轉咗藥約兩個禮拜,咳嘅情況有所改善,但引申到腸胃肚瀉問題,都瀉得嚴重,令我手腳無力,乜嘢都做唔到,之前仍然可以每日做2至3小時氣功,而家連行路都乏力。」

面對比第一代標靶藥更龐大的藥費,他表示之前靠積蓄加上朋友捐助的錢支撐,但經過近半年看中、西醫、藥費、補充品等,醫藥費經已花得七七八八,下個月覆診都要靠簽信用卡埋單。醫院社工將Jeff的個案轉介給蘋果慈善基金跟進,祈望可減輕醫藥費開支,另外Jeff亦正申請綜援,全因近年工作問題,一直要靠哥哥資助,但他覺得不能再添加哥哥的壓力。

身體狀況雖然轉差,Jeff仍然保持正面心態,他指去年病發初時好積極學氣功,每晚9點入睡,清晨5點前起身吸取陽氣,令身體變得更健康。談到年初時咳到見血,情緒會否變得困擾?他堅定說:「我都盡量令自己舒服,我成日都覺得其實係控制唔到,可能轉頭擴散呢度,又擴散去嗰度,無嘢控制得到,學習接受嘅心態係好重要。但痛苦同辛苦始終係無可避免,當佢(痛楚)攻擊你,當佢(痛楚)嚟時候,盡量去學習點樣放鬆,有信仰就祈多啲禱,盡量令到自己心情平和放鬆,就已經係好止痛方法之一。」

身體痛楚令生活改變很大,他指右膊從1月開始痛後,影響到日常生活,甚至連行路都行得不好:「我而家試過好努力朝早5點鐘起身,喺屋企自己行,行5分鐘我都頂唔順,要瞓返低休息一陣。之前1月係咁咳,咳到瞓唔到,但係睡眠係好重要,而家呢兩個禮拜就係個腸胃痛。」

期望回復七成基本活動能力

患難見真情,好友孫慧雪及謝珊珊不斷支持、幫手,馬浚偉也於阿雪IG呼籲後第二晚,在網上開Live演出為Jeff籌集醫藥費。談到各方支持,Jeff開始雙眼通紅哽咽說:「仲有好多藝人幫我,但係無謂逐一開名,好感激佢哋。其實舊年8月病發時感覺都無咁大,上次有出條片,好多人知道我呢個問題,可能當時個人狀態好啲,個人都會積極,我要打贏佢,有少少唔識死,個人未夠痛,而家呢兩個月,真係感受到佢(痛楚)嚟,唔係講笑。當時(去年8月時)講好多依然有理想,好返想做啲乜,而家我都真係好想再拍多啲片,但係呢兩個月真係搞唔掂,所以盡量希望唞好之後慢慢再做,如果你而家問我最重要……最重要係身體健康先,就算要與瘤共存,嗰瘤喺度唔緊要,但係起碼身體狀況似返正常人,我當七成,好基本。」

之前跟女友同住梅窩,平靜生活有利好好休養,但自從身體變差,Jeff的哥哥叫他跟女友搬到自己家住,好讓一家人多點相處時間,Jeff也可以多點陪伴年屆84歲有長期病患的父親,他說:「當然一家人感情更加好,但變相亦對哥哥、佢屋企人係一個負擔,因為本身要照顧一個長期病患者,多一個癌症病患者,係一件唔容易嘅事。」

受訪前,Jeff獲中醫師教導用按摩紓緩身體痛楚,他說:「感覺係舒服好多,但每日按摩,講緊每次要按40分鐘,咁係咪親人每日都可以花呢個時間呢?確實有難度,唔係願唔願意,係環境許唔許可,又要照顧你三餐,因為我隻手郁唔到,我煮唔到嘢食,洗碗都做唔到,想幫都幫唔到。」

意志再堅強的人,也有軟弱無助一刻,Jeff忍不住含淚說:「有件好簡單嘅事想分享,我隻手開始痛嘅時候,咁我想彈吓琴、玩吓結他,發覺連啲最基本動作都做唔到嘅時候,其實無得講其他嘢,其他嘢都唔需要再講,可能只係一個痛嘅位置,已經可以摧殘你好多嘅嘢,所以我覺得最重要、最重要、最重要係身體健康,正常就OK啦。」

身體變化也令Jeff較易感動眼紅,他說:「會呀,你而家都會見到我較情緒波動,啱啱都有朋友嚟探我,好熟嘅,唔需要講啲乜嘢,但我都會眼濕濕。」Jeff說好多朋友患難見真情,未必三言兩語可以表達,但每次見面探訪都令他開心。

在其他休息時間,Jeff會甚麼事都不做,他說:「盡量令自己靜心、平靜,呢點好重要,因為上天要你點,你控制唔到,你要接受、消化,再去放低。」Jeff自言相比去年接受訪問時,神情落魄好多、消瘦好多,但他堅持體重盡量保持在60公斤以上,但近兩個月都無可避免地輕了2公斤。飲食方面,他表示胃口每段時間不同,早前咳得厲害的時候,胃口沒有受影響,他會盡量食到便不停食,因為一定要強化身體,但近月腸胃問題,令他這幾天完全不能進食,因為每次進食後,好像完全不能排出,谷到肚脹感覺辛苦。雖則如此,但Jeff仍表示會尋找不同方法,如去年學氣功,近日學中醫按摩,希望令身體痛楚紓緩,讓身體機能回復正常,因為他深明戰勝病魔,正面積極心態是最大的元素。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁