港台空降處長抽走訪問 
LMF阿肥:世界黐咗線

更新時間 (HKT): 2021.03.08 02:00
■阿肥開live反擊新任廣播處長李百全指他們歌曲「不正派」的指控。互聯網圖片

民政事務局副秘書長李百全上周一空降接任廣播處長,香港電台面臨「政治正確」考驗,早前《蘋果》已率先爆他上任四天便「發官威」,要求節目要他過目,本來昨晚播出的《香港故事》是訪問香港樂隊LMF(大懶堂),但他狠批不夠decent(正派),又指LMF有極端政治取態,經常唱粗口歌,直指首歌「全部都係器官」,反問「點解唔搵曹永廉做訪問?」最後節目換上2017年的「新浪潮.人」麥家瑜舊訪問。

直言得啖笑

對於訪問突然被抽起,LMF成員阿肥大前晚在Ig開live指得啖笑:「呢個世界好癲,可能會再癲啲,我哋諗唔到有幾癲、有幾邪惡,我哋唔係佢嘅心,唔係佢咁諗嘢。我哋呢啲咁唔decent嘅樂隊,港台節目抽起咗,其實冇咩影響。我覺得好笑嘅係一個冇讀過新聞、冇做過傳媒機構嘅人,空降做咗處長,然後嗰個禮拜嘅節目畀佢睇過先可以出街。」

阿肥表示已習慣冇人播LMF,世界上發生的事更叫他無奈:「反正我哋嘅歌冇電台、冇電視台會播,其實一直以嚟都冇播過,有咩所謂?相比起嗰15個人本來可以保釋,然後律政司上訴立刻要佢哋還柙呢件事,佢哋嚴重好多。緬甸亦都好黐線,開真槍,殺人!殺平民!殺年輕人!相比起呢啲事,我哋嗰啲唔值得提,個世界黐X咗線!基本上連粗口都表達唔到,好多嘅無奈、無語,講唔到!」

壞人有報應

阿肥指由細到大,父母、老師都教他要做好人,最緊要有良心、有公義,不要做壞事︰「我哋睇佢哋日日做壞事,佢哋唔驚㗎喎!唔怕有報應?地上行走係俾魔鬼統治,但係就可以咁嘅咩……都係嗰句啦,就算佢哋唔信有報應都好,我信。做壞事嘅人係一定有報應!」

三天前,阿肥在Ig上載他們的演唱會黑白照,留言︰「LMF #decent」,前日他又再貼石雕相,石雕上有塗了「FXXK」的字眼,又以英語反擊「不夠decent」的指控,網友就留言指︰「LMF嘅歌其實教育意義幾重。」

娛聞樂陪你走遍全球追星,即Like「娛果」FB 專頁!
BannerBanner