「皇」家家事真人show 紀錄片《皇室生B揭秘》好睇過電影劇集丨果燃上架

果燃紀錄丨皇室生B揭秘

更新時間 (HKT): 2021.03.08 16:24

人哋英國皇家嘅恩怨情仇結婚生仔,關你乜事?無嘅,身為一個中佬,望住本過期BNO,感懷港英遺民嘅身世,八卦一下前事頭婆嘅家事亦無可厚非。畢竟皇家嘅家事從來都係一個萬眾矚目嘅真人show,而且呢個show比市面上任何一齣宮廷劇更melodramatic。

中佬潮語有云︰「起個孖,做爸爸。」生仔嘅喜悅,當然比連贏兩場馬更興奮。試諗吓家中添一員,家族壯大開枝散葉,家庭生產力以至屋企GDP豈非增加了無限可能性?所以無論係深水埗劏房窮等人家產子,定係達官貴人皇親國戚嘅小王子小公主橫空出世都好,添丁弄瓦,都係修身齊家、個人乃至家族嘅大事!

至於喺生仔界生到「全球可能會有幾億人睇直播」嘅,就肯定非英國皇室莫屬喇。點解?凡人生仔就話「修身齊家」,但係皇室生個王子殿下出嚟,就直程去埋「治國平天下」嗰個level,你話仲唔係萬眾矚目?《果燃推介》英國紀錄片《皇室生B揭秘》 ,真係「唔生唔知湊仔難,唔睇過都唔知皇室生仔有幾煩」!

一按到果燃台收睇 果燃紀錄丨《皇室生B揭秘》

戴安娜王妃曾經講過︰「當我生仔嗰陣,我覺得好似全國都跟埋我一齊作動咁。」呢番話無講錯㗎,首先就係英國博彩公司會開個盤口,生仔叫咩名?生女叫咩名?咪住先!仲會唔會有皇室頭銜或者稱號?(就好似「康瓦爾公爵」爵位永遠都屬於英國君主嘅長子咁,所以查理斯王子乜都唔使做就係公爵喇!)《皇室生B揭秘》 裏面仲話,想當年查理斯王子個名,都足足花咗一個月先定到落嚟。嘩,咁呢個月博彩公司應該賺唔少了。

好喇,買定離手加派彩作實之後,王子 / 公主BB將會進入一個跟足佢一世嘅「萬眾矚目結界」——讀邊間學校?用右手定左撓?鏡頭前第一次講嘢講咗啲乜?有冇夜蒲?同邊個拍拖?(下省一萬個處境)作為皇室一分子,基本上你一行出嚟,就已經係英國國民以至全球觀眾嘅焦點,人人都關心你,人人都望住你,仲慘過當年荷里活電影《真人Show》(The Truman Show)嘅劇情——至少Truman(占基利飾)係不知情狀況下被偷拍,至少Truman每日都係做番自己。皇室歷史學家凱特威廉斯(Kate Williams)就甚至咁講︰「皇室成員還在子宮內時,才有私人空間。」真係聞者傷心,坎坷個坎。

自由係寶貴嘅,但皇室人員嘅自由係大眾嘅。就好似戴安娜王妃懷孕初期,就被拍到喺巴哈馬度假時着住比堅尼泳衣,令到英女皇陛下震怒。呢啲被收緊自由嘅情況並唔係偶然,甚至可以話係「傳統」——據《皇》片中史學家嘅說法,英國派官方人員觀察每位皇室成員出生嘅做法,可以追溯到1688年。歷史學家莎拉基士活(Sarah Gristwood)就話︰「皇家產房係一個好擠擁嘅地方,逼到嚇死你。」凱特威廉斯就補充道︰「你企得越近所謂產道口,就越係光榮。而所有皇室成員出世,都要由一位高級政治家見證。」「維多利亞女皇亦曾咁講過,佢每日都要同呢班男人打交道,佢唔想畀呢班人睇住佢生仔!」So sad,一個皇室BB,由未出世開始,就已經喺咁樣嘅鎂光燈下長大,可想而知對媽媽也好,對BB也好,壓力係有幾大!

不過壓力大嘅並唔止媽媽同BB,做「姐姐」嗰班壓力都唔唔嘢小。所謂「姐姐」,其實就係皇家保姆。其中一位叫瑪利亞博拉略(Maria Borrallo)嘅保姆,就嚟自享負盛名嘅保姆學校——諾蘭德學院(Norland College)。淨係要喺呢間學院讀完個學位,都要成4.5萬英鎊英鎊,差唔多45萬港紙!呢間諾蘭德學院堪稱係保姆界嘅頂級名校,唔止教你湊仔,仲會搵軍事情報官嚟教你自衛術,話晒請得起保姆嘅十居其九都係達官貴人,無返兩三下散手邊得嚟安全感呀?而最誇張嘅係,呢間學校仲會教埋你玩飄移——萬一架車打滑,你都識得救車,保護後座小朋友嘅安全。其實,係嚟做保姆定係做特工呢?難怪諾蘭德學院校長珍納羅絲(Janet Rose)都話︰「係有啲似占士邦同仙女保姆(《Mary Poppins》,1964年美國電影,港譯《歡樂滿人間》)嘅混合體㗎!」

然而,保姆親啲定娘親啲?上一代,保姆同皇室成員之間較容易醞釀出「桃姐」般嘅主僕情感,好似「事頭婆」英女皇咁,佢嘅貼身保姆「波波」,係一位永遠都會喺女皇身邊嘅忠心保姆,就算係女皇嫁畀菲臘親王之前一晚,女皇都容許忠心耿耿嘅波波瞓喺隔籬……房——咁都難怪嘅,觀乎我哋身邊嘅親朋好友,但凡有小朋友又有「姐姐」嘅,有不少比率嘅家庭都會容許小朋友同「姐姐」一齊瞓,佢哋嘅感情自然較深。

但係,再傳統再講規矩嘅皇室,始終都迎嚟咗突破——已故戴安娜王妃,就希望有一個同皇室傳統截然不同嘅育兒風格,佢希望「自己湊」,令一對小王子更能感受到母親嘅溫柔與慈愛。但係獲得「自由」,好自然又會變得「唔係咁守規矩」,話說當年英女皇見到威廉王子同哈里王子「非常百厭」時,都曾經表示「非常震驚」。或者只能夠咁講,生於皇室,就係如此規行矩步。

Anyway,比較左膠的一句,皇室成員都係人,都有阿媽生,都有權利享受到母愛。生於皇室,含住金鎖匙出世,是利;但萬千聚焦於一身,比凡人更受注目更欠自由,是弊。到底係咪利多於弊?呢個辯題應該會拗到下個世紀,但係睇《皇室生B揭秘》就唔使等,睇完佢,你會回味到下個世紀。

果燃台 | 果迷專屬嘅影片世界

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner