UA結業|革新戲院抗老翻 引入IMAX提高享受 「對戲迷功不可沒」

更新時間 (HKT): 2021.03.08 09:48

UA Cinemas(娛藝院線)今日宣佈全線結業,啟動清盤程序,遣散逾百員工,昨晚開始停售戲票。UA陪伴港人36年,為香港影業創不少先河,包括首間引入「口述影像」上映的《逆流大叔》,可讓視障人士使用專用接收器,聽口述影像欣賞電影,打破電影界限,早年UA亦是首間於2007年引進IMAX巨幕技術,再次吸引戲迷進場支持。

受疫情影響收入,電影業界擔心UA Cinemas結業會引起「骨牌效應」,田啟文今早接受電台訪問表示:「好震驚,UA係龍頭院線,佢排片太強係提升港人選戲嘅選擇,佢喺暑假排片都係第一手外語片,此消彼長,排得咁好,變咗華語片比較失色,但對觀眾係好事,因為同外國同步,有時嗰邊都未做,反而香港上映先。」

田啟文稱疫情下排戲院座位只可排一半,經營百上加斤,聽聞之前UA想賣盤,不過因為UA旗下七間戲院均位於黃金地段,惟市況欠佳未有「白武士」出手,最終只賣出一間,「佢哋一直想賣盤等有心人去經營,但係而家都頂唔順,電影一直難做,市場萎縮,租金人工上漲」。田啟文指身為業界人士,最擔心影響投資者來香港,「咁大間龍頭院線都頂唔順,咁即係香港冇得做啦,咁就唔喺香港投資拍電影」。

UA貢獻功不可沒

香港影視協會理事長洪祖星接受電台訪問,指香港戲院裝修變得漂亮及現代化、電話網上預約等,UA功不可沒,「特別IMAX係佢帶頭搞,呢個財團喺香港電影界起咗好大作用,睇戲有娛樂、飲嘢全部係UA帶頭搞,搞到而家咁先進,UA真係好大貢獻」。主持人回想以前戲院有曱甴、老鼠,座位又污糟。

UA當年引進IMAX巨幕用很多錢裝修,成本高,洪祖星笑稱UA提高戲迷享受,對抗老翻泛濫年代,再次吸引戲迷入場,「UA呢件事令我哋諗戲院真係好難經營,租金好貴,疫情搞咗年幾,停咗差唔多1年開唔到,租金一百幾十萬,仲有人工、水電,在商言商,香港戲院而家全部蝕本,唔係有大財團,執笠應該有百分之五十,而家只係頂住先,政府支持亦少之有少,我係諗唔到UA會收檔」。

洪祖星估計會有熱衷做戲院的大財團做「白武士」接手,「而家要賺大錢好難,呢幾年經營上應該係打和,租金咁貴,你賺到都唔係戲院攞晒,業主要分,同埋疫情真係影響好大,收入可能都唔夠畀人工」。

UA Cinemas在香港共有7間戲院,包括UA MegaBox、時代廣場、UA Cine Moko、青衣城、淘大、大埔超級城及東薈城。UA院線旗下「UA K11 Art House」戲院於本年2月底停運,該戲院2019年暑假才開幕,現時有關戲院業務由林建岳旗下的豐德麗集團收購,以5,600萬元收購尖沙嘴K11人文購物藝術館L4及L5,用作戲院營運及相關業務,期限是今年3月至2031年1月3號。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner