UA結業丨高先老闆曾麗芬指對電影業打擊重大 黃百鳴堅持開戲保員工生計

更新時間 (HKT): 2021.03.08 15:23

UA Cinemas(娛藝院線)今日宣佈全線結業,啟動清盤程序,遣散逾百員工,電影人都感到好可惜,Golden Scene(高先電影)老闆曾麗芬(Winnie Tsang),上月擲3,000萬在堅尼地城開高先電影院,對於陪伴港人36年的UA結業,Winnie認為對業界是重大打擊,坦言:「好可惜,好唔開心!」

Winnie指UA戲院是迷你戲院的先鋒,「1985年創立咗UA6,跟住陸續咁開,而家開到六、七間,尤其最後嗰間K11都成12個月,真係好難,而家突然之間結業,對我哋業界係一個打擊。」問到Winnie這時候仲搞戲院,擔唔擔心呢?她說:「咁我唔擔心,我都係一間。」有批評政府抗疫措施混亂,會否擔心這不是合適時候?她說:「而家得五成又唔畀賣嘢食,對收入好大影響,希望政府早啲放寬,令到電影業能夠再次增長番,我唔可以話會蓬勃,但都希望增長返,亦希望八大(片商)公司都多啲放返啲片出嚟,等戲院界有啲大片做,幫吓戲院行業。」問到會否考慮接手UA?她說:「唔會,唔係,冇咁嘅資源,講笑。」

Cinema City院線老闆黃百鳴對UA結業感到非常痛心,他以短訊回覆《蘋果》:「香港今日有大量優質的戲院突然結業,這是對香港電影業一個非常沉重的打擊! 我作為業界一份子和一名熱愛電影的觀眾,我是感到非常痛心、惋惜和無奈。疫情開始至今, 政府對待香港戲院和電影業界的處理手法和態度的問題,我已經太多次公開表達不滿,今日都唔想再重複。畢竟我個人能力有限,面對無法改變的困境,我只能繼續盡我能力保障我所有員工的生計。 同時,作為一個電影人,無論環境有多艱難我都會堅持繼續開戲,希望電影業界更多人有工開,一起捱過疫境。」

另外,ACX Cinemas@北角匯負責人黃永峰(Charlie)今接受《蘋果》訪問,他表示事前有同UA傾過接收部份戲院,想不到未成事對方已結業︰「可惜同無奈,UA喺香港都經營咗36年、係前輩,大家都一定去過過UA睇戲,呢個情意結,情況大家都明白,但無辦法。」目前Charlie打算逆市發展增開戲院,近日同發展商傾約,可以提供較以往相宜的租金及優惠。他話近日戲院重開,觀眾入場意欲旺盛,到假日入座率達9成,見到市民都想入場睇戲,他說︰「仲要睇到而家係未有西片,港產片一兩部,都可以keep到呢個成績,戲院唔係話冇得做,係點控制成本。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner