張敬軒現身《勁歌》獲何麗全及樂易玲探班:百花齊放係最開心嘅事

更新時間 (HKT): 2021.03.09 19:51

曾志偉上月加入TVB擔任副總經理,踢走何哲圖掌管音樂事務,與三大唱片公司「破冰」成功,三大唱片公司高層包括環球的黃劍濤、Sony Music的陳國威和華納的Gordon Lee及旗下歌手出席記者會,英皇都有派高層代表出席,但就沒有歌手撐場。

今日英皇歌手張敬軒現身電視城為《勁歌金曲》錄影,其間何麗全及樂易玲親自到現場探班,對於志偉掌管音樂事務,令更多歌手可以亮相電視台,軒仔說:「其實我不嬲都覺得樂壇可以百花齊放,對樂迷係最大得益嘅事,對行業都會有好多正面嘅影響,我哋真係需要唔同嘅渠道將啲音樂推介畀觀眾。」

問到會否爭取唱劇集主題曲?軒仔說:「隨緣喇,我之前都唱過,但係我個人偏愛古裝劇多啲,但係都要睇返監製同編劇覺得我適唔適合。」再問有否興趣拍劇?軒仔笑說:「我以前客串過拍《四葉草》,而家都變咗樹喇!不過我個人比較鍾意拍古裝,之前有諗過叫化妝師幫我黐頭套,但係我又驚吊威吔,因為以前試過拍廣告吊咗10幾個鐘,搞到嗰個部位都痛,擔心啲身體功能有影響呀!」

另一方面,太極樂隊的成員唐奕聰(Gary Tong)於上周二(2日)疑心臟病發猝逝,終年57歲,軒仔表示與Gary有很多回憶:「我入行已經同Gary哥合作,佢喺行內係一個十分受歡迎嘅友誼先生,從來都冇發脾氣,成日都好開心,只要見到佢,嗰啲擔憂都會散開晒,係一個好正能量嘅人,所以佢嘅離去,真係好難過,相信唔會有人可以取代佢嘅位置。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner