開電視全台11人丨藝員無懼被嘲弱台 嚴崇天自信:我哋唔會睇唔起自己

更新時間 (HKT): 2021.03.09 00:30

香港有四間免費電視台,公營的港台近日變動多多,ViuTV追到無綫有氣冇掟唞,令大台急召曾志偉回巢做高層,而被視為「弱台」的香港開電視,人丁最單薄,全台只有11位藝員,但個個都周身刀兼瓣數多多,自喻「好抵用」,面對強敵更表現齊心,嚴崇天說:「盛唔盛世,唔係睇個台,係睇你努唔努力,要人睇得起你,首先要睇得起自己!」

論年資排輩,李尚正、盧頌恩(妹頭)、黃芳雯(Paula)和嚴崇天都在開電視(前身有線電視)工作超過10年,阿正曾見證有線盛世時代:「好似有廿幾卅人嘅,最記得大家除晒衫影海報,仲有陳啟泰。」Paula最欣賞公司念舊情:「我都攞咗個十年金牌,其實我喺無綫都攞過,我覺得有線好好,無論經歷幾多風雨,對女藝人都非常好,你可以放心結婚生仔都有工開,公司唔會待薄你。」不過,懷愐過去不如展望將來,新一代的藝人李麗珊(Lisa)、鄺芷凡(Omi)、馬梓軒(William)、霍嘉恩(Gracey)、連佳麗(Kelly)、林靜莉(Jeannie/莉莉菇)和王凌燕(Vanessa)對公司亦有信心,Omi是由有線順利過渡到開電視的其中一人,她說:「之前keep住內部製作,反而現在多咗同外面製作,有啲crossover,節目種類係多元化咗。」

嚴崇天:要建立自我形象

嚴崇天認同現在的都市人未必會乖乖坐定睇電視,作為藝人,建立自我形象更重要,「開電視畀好多自由度我哋,可以做生意同其他工作。真心講,大台又好,細台又好,睇你點build up自己個brand,唔好賴個台唔好,咁大台都好多人寂寂無名,走咗又鬧唔畀機會,咁你有冇爭取機會先?有冇特別地方令人要畀個機會你?好認同音音姐(邵音音)同我講,你要人哋睇得起,先要睇得起自己,連自己都睇唔起就冇得做,所以我哋唔會睇唔起自己。」

莉莉菇全台人工最低

嚴崇天能操英語、韓語和普通話,訪問當日即興做司儀,而阿正和妹頭則各自帶領隊員分成紅、白兩組,回答一些有關公司的問題。出乎意料之外,大家竟然忘記了開電視的開台日和台徽顏色,莉莉菇自認有溫書竟將開台年份答錯是2017年,其實是2018年;而答台徽「紅白黑」的Lisa就自認色弱,最後要兩組齊心協力才能找出答案,十分搞笑。談到最高薪和最低薪藝人,前者大家都推舉阿正,笑指對方時薪最高;後者是最新加入、被「連登仔」追捧做女神的莉莉菇,她是前港姐季軍鍾慧冰的女兒,正職做生活科技資訊網記者。她笑說:「好啦,我承認我係!」她表示自己跟開電視好有緣:「我未嚟呢度做之前,有一半人都嚟過我屋企,Omi係我小學同學,連佳麗就係我大學同學,Paula係我媽咪嘅同學...」37歲的Paula與67歲的冰姐年紀相差一大截,此話一出全場爆笑,莉莉菇即補鑊說:「唔係唔係,媽咪嘅同事,我媽咪成日都話有線係好溫暖嘅家庭。」妹頭就覺得低薪即是抵用,「多啲嚟密啲手」,最緊要人人有工開。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner