伍仲衡為開騷秘密練兵 盼政府再放寬場地限制

更新時間 (HKT): 2021.03.09 17:34

去年因武漢肺炎疫情影響,音樂會幾乎完全癱瘓,音樂人伍仲衡在疫情下將音樂與大眾連結,邀請不同歌手在網上開live玩音樂,體會另類視聽。伍仲衡將於3月27、28號在旺角麥花臣開騷,昨日他聯同麥花臣節表演嘉賓樂手Jason Kui於場館宣傳。

伍仲衡已有1年多沒有真正踏台玩音樂,現正興奮倒數,期待大於緊張,日日秘密練歌。雖然入場人數有所限制,暫時場館只容許一半入座率,伍仲衡說:「實體飛已經賣晒,音樂會有live同步播出,網上收費劃一180元,吸引世界各地嘅人買飛,美國、馬來西亞、遠至荷蘭、挪威都有,真係冇諗過。」若肺炎確診數字持續下降達單位數,政府有機會放寬,開放多25%入座率,伍仲衡說:「我都希望疫情快啲過去,政府可以開多兩成半,多啲人嚟睇,若果真係開放,之後會盡快賣飛,現時收益同成本未能夠打和。」

伍仲衡以音樂人身份近日出席大小宣傳活動,包括上綜藝節目及開live,當上音樂KOL,他笑說:「幕前幕後我都係鍾意玩音樂,而家係多咗機會上節目。」演唱會流程經多次開會落實,參與歌手未計神秘嘉賓超過20位,歌曲有70首之多。另外太極樂手唐奕聰Gary Tong日前猝逝,伍仲衡與Gary多年好友,今次在演唱會中特別加插Gary作品。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner