閨房秘密丨裕美爆兜巴星林作制止收口 過夜分房瞓性需求不多

更新時間 (HKT): 2021.03.10 06:00

裕美和林作去年驚爆「林美戀」,林媽媽出言棒打鴛鴦,二人不但未被打散,反而更見恩愛。「封盤」裕美很享受這段戀情,她日前接受《蘋果》專訪時,更大爆林作性事。

裕美與口沒遮攔的林作相戀,耳濡目染下,她受到男友影響,回應傳媒的作風也變得出位兼大膽。林作近年為抽水宣傳,不惜周圍焫着火頭,他近日跟富三代鍾培生的「林鍾百萬一戰」更成為娛樂熱話,女友裕美都要被扯落水就事件表態,裕美樂於加把嘴:「我又唔覺得有咩壓力,我自己是非都唔少。我哋呢行,以前聽埋好多負評會唔開心,跟住就抑鬱。」裕美指從前迴避負面新聞,結果遷就別人委屈自己,現在已開竅化負為零,不再畏縮,還會勇敢面對問題。

裕美大讚林作在交往過的男友中最有安全感,兩人相處不是一般情情塔塔,反而經常炒炒鬧鬧,她揶揄林作包拗頸,「佢成日話自己係律師,職業病要拗贏。」裕美自爆曾動手制止林作收聲,「嗰次因為我睇唔過眼佢寸嘴鬧自己個朋友,我同佢講番咁係唔尊重人,佢又包拗頸話我冇自信,我覺得佢唔可以對我有人身攻擊,我自問好少發小姐脾氣,我咪兜巴星過去,嗰一巴佢都㷫咗一輪,成晚唔同我講嘢,隔咗一晚佢又思考反省咗。」這次「家暴」反令彼此加深了解。

要求着喱士睡衣

林作不時借與裕美放閃爭取曝光,她踢爆男友表演慾太強,「林作口裏或網上成日講埋啲鹹濕嘢,私下嘅佢其實唔係鹹濕仔,我仲有時懷疑佢係咪『基』,我哋一齊,佢好似冇嗰方面嘅需要。佢就算搭住我時都好gentleman。」林作對性事苛求低,裕美否認是他怕醜或身體太勞累,反衝口爆出林作有時要求她主動挑逗!「佢有時會叫我姣吓佢,我問佢我點解要主動?我直接同佢講想我姣佢,都要佢畀到我感覺先,我會講『你睇你副尊容』,佢成日話我着啲男人衫瞓覺,投訴我唔着喱士睡衣,我會話我都冇嫌佢個樣,所以佢唔可以嫌我。 」裕美指即使在林作家過夜,二人都冇同床,「我哋冇瞓埋同一張床,過夜都係分房瞓,我唔鍾意同佢瞓,我覺得自己一個人瞓,睡眠質素好好多,有時佢瞓先,我習慣夜瞓。」裕美似暗示大家情侶親密關係疏離,她說:「我年紀都有番咁上下,冇咩需要,我唔同男仔,佢都冇乜,佢有個好close男仔朋友,我先懷疑佢『基』味好濃。」

40歲前人工受孕

林作和裕美之間對生育計劃也不協調,他無意生下一代,裕美卻喜歡小朋友,「我有同佢講過話佢唔生,我去搵個鬼佬借種人工受孕,如果我同佢一齊,生出嚟BB係鬼仔咪好爆囉!」32歲裕美有計劃40歲前去人工授孕,趕高齡產婦的尾班車,若然最終都未能生育,她退而求其次領養,務求一圓做媽咪夢想。

裕美經常被林母Lily誤解貪財而看上林作,她謂拍拖後很少花男友的錢,反而有倒貼林作,「有時叫佢幫我拍一啲網上宣傳片,林作要收我錢,反而佢啲片,我又免費同佢拍同剪。嚟緊佢打拳賽好易賺100萬,我話要抽佢20%,佢唔肯啦!佢份人其實又孤寒又鐸叔,試過有次我買張畫,借佢張卡碌咗400蚊,一返到屋企就追我還錢。情人節出去食個情人套餐,四五百都嫌貴,仲要AA制,佢成日話我搵錢多過佢。」裕美因為不屑被林母指黐金糠,她索性靠自己同朋友夾份搞網上珠寶買賣,近日生意不錯,試過最高盈利月賺6位數字;裕美近日又學炒股票,專注錢搵錢,以自己能力去反擊「白鴿眼」的林母。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner