江嘉敏尊稱做「師姐」馮盈盈落閘寸爆嗌受唔起

更新時間 (HKT): 2021.03.11 20:06

昔日以好姊妹見稱的馮盈盈和江嘉敏,在去年6月因上何猷亨的富豪船P而正式決裂,試過同場視而不見,但正所謂「不是冤家不聚頭」,兩人將會合作TVB新節目《解構心機女》,其後馮盈盈率先在IG貼出以「破‧冰」做主題的世紀大合照,不過被網民發現她疑似P瘦自己,之後當江嘉敏將同一張相上載在IG時,她亦留言暗寸馮盈盈P圖。

唔知對方生理期

經過一輪「隔空過招」後,馮盈盈與江嘉敏今日終於正式碰頭,齊齊出席記者會。馮盈盈以一身戰鬥格現身,穿上小deep V兼露腰裝,反而江嘉敏包到上頸只晒雙臂兼露腿,明顯先輸了一截!其間兩人應要求合照並雙雙接受訪問,講到是否破冰,馮盈盈先說:「係走冰先啱,講緊佢第一次做主持,所以請佢飲珍珠奶茶為佢打氣,但係我唔夠細心,唔知道佢嘅生理期,所以冇準備到熱朱古力,真係唔好意思。」

寸江嘉敏早入行

兩人的「世紀合照」惹來P圖風波,有指被「P肥」的江嘉敏未有感到傷害:「邊個P肥我先,你講邊張相先,我又唔知邊個P肥我喎?冇乜嘢係會傷害到我喎!」盈盈則解釋相片是助手操刀,原相亦在對方的手上:「審美眼光好主觀,我亦從來冇講過啲相冇P圖,如果有P圖我會大方承認,唔會有P扮冇P。」

不過馮盈盈語帶雙關地說:「個底係好緊要,我朝早6:30出門跑步去水腫,keep住最佳狀態就唔使P圖。」嘉敏則擦鞋讚師姐,殊不知盈盈不領情,寸爆地說:「應該係我叫返你做師姐先啱,你係14年入行,嗰陣又拍劇又拍電影,反而嗰時我仲讀緊大學,所以你唔好再嗌我師姐,我受唔起!」

強調大家冇不和

之不過兩人屢傳不和,今次還被安排合作做主持,於是問到會否擔心最後「兩敗俱傷」?嘉敏說:「一直冇咁嘅事,只不過係大家不斷抹黑、發酵,但都要多謝大家,如果唔係大家嘅惡意抹黑,我應該都冇呢啲工作機會。」盈盈則附和地稱用行動證明係最好,合作做節目後的確有火花,但她強調兩人從來都沒有不和。對於有疑似「江媽媽」代女出頭,在網上鬧爆馮盈盈的fans,江嘉敏表示自己是公眾人物,當然願意接受所有批評,但始終家人不是公眾人物,希望不要太過火,她亦承認對此事有點嬲怒。

至於會否覺得自己是機心女,江嘉敏表示凡事也是有兩面看:「我自己覺得有人類存在嘅地方,就有心機嘅存在,因為好多人都試過,可能你想要追求一啲人嘅時候,你會喺佢面前買好多嘢畀佢試,或者做好多嘢令佢他開心,呢啲都係心機嘅一部分來的,所以我覺得係存在喺每個角落。」馮盈盈反而覺得:「應該問觀眾先啱,呢啲嘢好主觀。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner