專訪丨艾威親揭未能同偕白首遺憾 4年前曾離家出走自怨失敗

更新時間 (HKT): 2021.03.12 00:30

緣散了,情淡了,再挽回也只剩遺憾。

現年62歲的艾威活了大半生,誰想到步入花甲的他,去年忽然結束18年婚姻,曾陪太太Lisa走過生死難關,最後卻未能白頭到老,年過60仍選擇離婚,不相識的人都感可惜!艾威用了近一年日子,才走出離婚陰霾,現在回首過去,有苦自知,「離婚係唯一解決辦法。」

決定離婚後,艾威帶着伯恩山愛犬Sashimi搬到新居,開始老人與狗的生活;這個訪問,是去年9月約艾威,那時他說自己仍未跨過失婚逆境,結果一等就是半年之久;訪問這天,艾威帶着愛犬現身,適應了單身生活的他,精神抖擻,與愛犬相依為命。

4年前曾離家出走

2014年,Lisa患上子宮肌瘤病,當時艾威曾傾家蕩產,斥百萬為愛妻醫病,甚至願意捐肝救妻,獲讚是絕世好老公,以為兩人是不能沒有對方,為何卻走到離婚終曲?「家家有本難唸的經,好多問題解決唔到,到最後離婚係唯一解決辦法,惟有行呢步。」究竟是甚麼問題?艾威不願自揭瘡疤,「係乜問題好難解釋,一定牽涉到有人啱有人唔啱,無謂講出嚟,要大家評定誰是誰非唔係咁好。」

一段感情的結束,過程都不好受,嗌交與冷戰不停發生,「乜都試過晒,難以形容,到最後用平淡去解決。其實喺4年前,已經到差唔多成功離婚嘞,我試過離家出走,先去咗檳城十幾日,返嚟後冇返屋企,跟住去咗珠海一段時間,喺朋友間屋暫住。當冷靜期又好,當乜都好,畀咗一個……我都唔識形容,大家分開吓,睇吓點樣有乜睇法,然之後約咗喺尖沙嘴一間餐廳,坐低平心靜氣傾,傾完一輪,好啦,大家再試吓,畀啲時間大家,再嘗試挽救多4年,始終都係冇辦法,盡咗最後努力,都係要行到呢一步,雖然遲係遲咗,如果4年前……假如4年前離婚嘅話,大家少咗4年相聚時間,感情少咗4年嘅話可能更加好啲,因為時間越長越麻煩!」

離婚是最後一個共識

畢竟曾經相愛過,誰先開口提離婚呢?「冇話邊個提出,大家達唔到共識,惟有離婚就係最後一個共識,冇辦法,只有離婚至可以解決當中問題。」原來問題早在4年前出現,發生在Lisa痊癒後2年,艾威低頭摸着愛犬,欷歔問Sashimi:「係咪呀?」似乎變回單身後,跟愛犬傾偈已成為習慣,「其實養Sashimi當其時都有少少幫助,多咗隻狗,大家好似有啲問題可以解決到,但最後都係徒勞無功,幫唔到我哋呢段婚姻嘅延續,冇辦法啦,Sashimi!」兩人膝下無兒,視Sashimi為「兒子」,生活曾因牠變得充實快樂。

分開後,因為Lisa要返工冇時間,所以Sashimi跟艾威生活,亦成為兩人再見亦是朋友的橋樑,「因為我返內地時佢(指着Sashimi)扭計,擺佢喺苑仔(苑瓊丹)屋企時唔肯食嘢唔肯飲水,終於搞到入咗醫院,唔係辦法,我打電話畀Lisa話咁嘅情況,可唔可以幫我去睇住吓佢,咁佢搬返屋企住,一路照顧住佢。而家關係都維持到,算係正常朋友關係,唔係仇家。」離婚時是仇家?艾威皺眉,「Er,少不免大家會……因為嗰件事得唔到圓滿解決。」

人到暮年才離婚,艾威幸得家人諒解,「我唔知佢點同屋企人講,其實屋企人好錫我,當初我考訓練班都冇反對,我鍾意做乜就做乜,佢哋明白一定有原因,唔係貿貿然,唔係話因為有第三者諸如此類。」既然沒有第三者,年過60,為甚麼不將就過埋下半世?「有啲嘢唔係將就咁簡單,假如今時今日再用呢個方法解決,時間越長,你嗰個……用受傷形容好似過份咗,總之時間越耐,因為人與人之間相處,日子越耐感情越深,越遲分開越係傷心,又不至於用傷心嚟形容,會難受啦!時間越耐,難受程度越加重。」

獨居後成日自言自語

18年婚姻畫上句號,艾威百般滋味,「可惜,係一件失敗嘅事,非常失敗,纏繞我最耐問題,點解解決唔到,一路都諗唔到,點解解決唔到。」剛離婚的那段日子怎過?有否借酒澆愁?「借酒澆愁唔知算唔算,但發覺多咗自己同自己講嘢,以前成日拍戲,要交代劇情編劇會寫自言自語,嗰時我仲話『黐線,點會自己同自己講嘢?』,唔係喎,真係自己同自己講嘢,慢慢而家冇嘞,因為可能大家相處太耐。」

分手近一年,有否認識到新女友?艾威望着愛犬笑,「同佢啦,同佢拍拖。隨緣啦,好多朋友都話介紹女朋友畀我,仲問我想要乜,好似好多女仔介紹畀我咁,我覺得冇所謂,緣份嘅嘢唔使刻意,我哋呢行比較易識朋友,但唔會咁快啦,就算認識大家都要時間了解,我需要深思熟慮去雙方了解,有梗係好,人始終要伴侶,隨緣,比較着重溝通多啲,心靈上伴侶。仲信唔信愛情?信,點解唔信,實有,不過你遇唔遇到咁解。」是否仍未放下?「冇得唔放低,一定要去面對新生活,而家仲有朋友問係咪冇彎轉?係㗎,冇彎轉。」

時間雖然不能解決感情問題,但能幫他走出陰霾,「算係走出咗,始終一定要面對,當然決定前要做好心理準備,絕對唔係後生仔嘅一時衝動,係一個老人家嘅決定。每人case唔同,如果要分享,考慮清楚先離婚,唔係咁簡單,我係深思熟慮,無可選擇下作出咁決定。一直好多朋友問點解離婚,有機會影響到好多朋友對婚姻睇法:『咦,好似冇乜保障,之前好到咁,點解都發生咁嘅問題,睇吓佢哋做咁多嘢都唔可以同偕白首。』」

艾威不希望自己的失敗,影響大家對婚姻失信心,「如果你問我有乜勸喻大家,千祈唔好因為我呢段婚姻失敗,而對婚姻或愛情缺乏憧憬,每個人嘅性格唔同,去到最後將所有失敗當係上天安排畀你,可能上天有任務畀你,好多嘢係命中注定,唔好用我呢單case做例子,每個人都唔同,尤其呢個世界,以前好多嘢以為唔會發生,但原來會發生。最近睇到句說話─『失敗因為你唔夠強大』,我而家一直將自己強化,跑步曬太陽,婚姻失敗可能因為我唔夠強大,就係咁簡單。」

雖然愛情失意,幸工作得意,「工作幾順利喎,最近拍劇角色幾滿意,算代表作,唔係戲份多少問題,監製畀好大空間我。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner