【娛樂人物】結束18年感情 慨嘆非常失敗 
艾威離婚重傷 尋覓心靈伴侶

更新時間 (HKT): 2021.03.12 02:00

現年62歲的艾威去年忽然結束18年婚姻,回顧2014年艾威太太Lisa生子宮巨瘤,他不惜傾家蕩產花百萬為愛妻治病,惟兩人經歷生死後,最後無奈勞燕分飛,艾威說用了年多時間才走出離婚陰霾,回首過去有苦自知:「離婚係唯一解決辦法。」幸好他還相信愛情,但不急於拍拖︰「人始終要伴侶,隨緣,着重心靈上伴侶。」

艾威日前帶着現時與他相依為命的愛犬Sashimi接受專訪,問到離婚原因,他不願揭瘡疤:「好多問題解決唔到,到最後離婚係唯一解決辦法。係乜問題好難解釋,一定牽涉到有人啱有人唔啱,無謂講。」

養狗變得充實

艾威坦言感情結束前,嗌交與冷戰不停發生:「乜都試過,最後用平淡去解決。其實四年前已經差唔多成功離婚,我試過離家出走,去咗檳城十幾日,返嚟後去咗珠海朋友間屋暫住。當冷靜期又好,大家分開吓,之後約咗喺尖沙嘴餐廳,坐低平心靜氣傾,傾完再嘗試挽救多四年,始終都冇辦法,盡咗最後努力,都要行呢步,雖然遲咗,假如四年前離婚嘅話可能更好,時間越長越受傷!」

艾威說離婚大家有共識︰「冇話邊個提出,大家達唔到共識,惟有離婚就係最後一個共識。」問題早於四年前出現,即Lisa痊癒後兩年,艾威低頭摸着愛犬,欷歔問Sashimi:「係咪呀?其實養Sashimi當時都有少少幫助,但最後都徒勞無功。」

兩人膝下無兒,他已視Sashimi為「兒子」,生活因牠變得充實快樂。分開後,愛犬Sashimi跟艾威生活,更成為與前妻再見亦是朋友的橋樑,他說:「因為返內地時Sashimi扭計,擺佢喺苑仔(苑瓊丹)屋企唔肯飲食,搞到入醫院,惟有打電話畀Lisa叫佢幫我睇住佢,咁佢搬返屋企住照顧佢。我哋關係都維持到,算正常朋友,唔係仇家。」離婚時是仇家?艾威皺眉說:「哎,少不免……因為嗰件事得唔到圓滿解決。」

朋友介紹對象

離婚的艾威自嘆︰「係一件失敗嘅事,非常失敗。」他說剛離婚時發覺多了自言自語,幸而近日已減少了。愛情失意,幸工作得意:「工作幾順利,最近拍劇角色幾滿意,算代表作,監製畀好大空間我。」分手近一年,艾威坦言跟老婆冇彎轉,朋友為他介紹對象,他還相信愛情,但不急於拍拖︰「人始終要伴侶,隨緣,着重心靈上伴侶。」

場地提供:Chillax(銅鑼灣)

撰文:余燕儀

攝影:林賓尼

娛聞樂陪你走遍全球追星,即Like「娛果」FB 專頁!
BannerBanner