杜Sir提醒電影人不要硬碰敏感題材:要聰明地去做

更新時間 (HKT): 2021.03.12 23:23
杜琪峯提醒電影人不要「硬碰」敏感題材,更叮囑大家要繼續做之餘,更要「聰明地做」。(電視截圖)

導演杜琪峯(杜Sir)在港台節目《鏗鏘說》中,除了鼓勵年輕人「一定要做落去」外,一向擅於拍攝警匪片的他,亦有在節目中提到他的創作靈感是源自社會及生活,更指2003年若沒有大遊行爭取普選,就未必有電影《黑社會》選話事人的劇情。

節目中,主持蘇玉華提到杜Sir曾說若當日沒有進娛樂圈,有機會去做警察,甚至是一個貪污警察,提到此事,杜Sir表示自己最終沒有行上做警察這條路,所以不知道結果,但他卻謂「喺心底裏面,我自己覺得逢係做咗一啲犯法、唔正當嘅嘢,遲早都要還嘅,好似而家社會出現好多問題或者好多嘢,今日唔能夠總結而家係點,但我相信日後都會有啲嘢,話畀大家聽係對定錯。」

蘇玉華問杜Sir未來會否拍警匪題材電影,他先表示不知道現時有沒有人拍關於警察的電影,而蘇玉華指現在好像沒有人敢拍攝時,杜Sir即說:「係呀,因為越嚟越遙遠,我會諗可以唔從呢個角度(警察)去諗,如果警匪片嘅話,會搵啲比較唔係咁矛盾性嘅題材去諗,用你話得嘅方法,去揣摩一個我話得嘅方法,例如我同韋家輝嘅《神探》,同警察冇關係,我講嗰個人點去睇一件事,唔當係警察image去講,就會冇咁直接去到一啲大家抗拒嘅位。」他又叮囑年輕人若要拍攝電影,沒有必要去硬碰某些題材,更講明:「一定要做落去,但一定要聰明地去做。」

電影題材來自生活

訪問中,蘇玉華問到杜Sir是否覺得香港觀眾夠聰明去解讀他的電影,皆因很多觀眾指杜Sir的電影中含有很多政治隱喻,「例如電影《黑社會》內講到關於選舉、爭做話事人,你係咪真係有政治含意喺裏面?定其實冇?只係啲人諗多咗?」杜Sir就表示沒有刻意去想這些事情,因為所有創作的靈感也是來自社會及生活:「例如2003年大遊行,所有人要求有個普選,呢個好簡單就係社會上面嘅聲音,當拍《黑社會》嘅時候,又咁啱黑社會個字頭又有得選,你話大家有冇關係?其實一啲關係都冇,但整整下個氣候產生,兩嚿嘢走埋一齊,係個時代畀我嘅感覺,我就寫啲咁嘅嘢,係咪刻意去搞?我冇刻意㗎!佢唔出現嗰啲嘢(遊行),我咪唔會出現囉,我意思係話如果冇嗰啲訴求,又唔會出現嗰個題目或議題。」

杜Sir的電影題材很多時會提到「宿命」,對於自己和香港的宿命,他笑指自己是由「做boy變咗做導演」,對於香港,他就認為這是一個好另類的地方,皆因這裏充滿靈活性,全世界也沒有任何地方像香港一樣:「如果香港跌入咗一個框架入面,就不幸,佢(香港)係一個好靈活嘅地方,人靈活、制度嘅好處,法治各方面形成咗香港出嚟,其他地方冇。佢嘅宿命就係得佢一個,佢唔似呢個又唔似嗰個,佢似佢自己,如果佢一旦變咗,佢就離開宿命,仲有一息尚存的話,我覺得我哋應該充滿希望,我哋應該積極啲面對未來。」

在節目尾段,杜Sir選擇了於2004年上映、由郭富城、古天樂主演的《柔道龍虎榜》送給香港人,「拍嗰時因為沙士,本來部戲唔係咁嘅,但我覺得嗰時真係同而家差唔多,大家絕望到不得了,我覺得呢刻遇到嘅問題係一定會過去,疫情一定會過去,從來冇一場疫情到而家係唔會過去嘅,問題係點處理呢個疫情。柔道最重要係企返起身,撻咗落去起返身咪得囉,不停咁去戰鬥。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner