破冰合照各自P瘦自己 
馮盈盈喪窒江嘉敏「大家都係心機女」

更新時間 (HKT): 2021.03.12 02:00
■馮盈盈(右)一副戰鬥格現身記招, 將穿短裙露腿的江嘉敏比下去。

馮盈盈和江嘉敏去年因出席富豪船P後反目,近日她倆被安排主持節目《解構心機女》。大前日開工她們各自在社交網上載「破冰」合照,馮盈盈先點題以「破。冰」做引子,江嘉敏則留言以生理期「走冰」為由拒飲馮盈盈請客的凍珍珠奶茶,兩人又被指各自P靚自己樣貌才上載照片,讓對方臉容繼續肥脹示人,顯然面和心不和。昨日兩人在將軍澳舉行的節目記招上再交鋒,繼續表面互相恭維,實則針鋒相對。

自認未夠細心

馮盈盈昨日穿上bra top晒事業線搶鏡,合照前更補妝,讓只露腿的江嘉敏站着等。問兩人是否「破冰」?馮盈盈說:「係走冰先啱,講緊我請佢飲珍珠奶茶,嘉敏第一日做主持會緊張,所以請佢飲嘢為佢打氣,係我未夠細心。」更隨即向江嘉敏致歉︰「唔知道你生理期,冇準備到熱朱古力。」

談到「破冰合照」的P圖風波,江嘉敏說:「邊個P肥我先,你講邊張相先?」馮盈盈暗寸︰「我從來冇講過我啲相冇P圖,有P我會大方承認,只要唔好P到面目全非又唔認咪冇問題囉。」她解釋相片是助手操刀,原相亦在對方手上,更語帶雙關指個底好緊要,所以早上六時半出門跑步去水腫,保持最佳狀態就不用P圖。

受唔起做師姐

其間江嘉敏突然擦鞋叫馮盈盈做師姐,馮盈盈反應十分大:「應該係我叫番你做師姐先啱,你14年入行,嗰陣又拍劇又拍電影,我仲讀緊大學,所以你唔好再嗌我師姐,我受唔起!」被窒的江嘉敏只識笑住解畫︰「主持你係前輩嘛!要跟你學嘢。」

對於屢傳不和,問二人被安排合作做主持會否擔心「兩敗俱傷」?江嘉敏說:「一直冇咁嘅事,只係大家不斷抹黑、發酵。」馮盈盈則附和稱最好用行動證明,強調兩人從來沒有不和。談到對心機女的看法,江嘉敏認為全人類都是有心機的人,馮盈盈則謂:「嘉敏都講過,心機可能係好嘅,可以代表心思,所以大家都係心機女。」

江嘉敏談到之前有疑似「江媽媽」代女出頭,在網上鬧爆馮盈盈fans,她激動說自己是公眾人物,願意接受批評,但希望家人可倖免。而馮盈盈前晚貼相叫「Shut up」,指該輯令人差點認不出她的相全靠最強filter:化妝、髮型、造型和攝影,似有弦外之音。

娛聞樂陪你走遍全球追星,即Like「娛果」FB 專頁!
BannerBanner