梅小惠憶舊愛曾偉權只有美好 不否認曾志偉叫回巢:總之大家係好朋友

更新時間 (HKT): 2021.03.13 14:17

最近香港電視界爭鬥激烈,大台被ViuTV氣勢嚇到要請曾志偉回巢做高層,掀起一陣熱論。與大台甚有淵源的梅小惠接受港台節目《舊日的足跡》訪問,表示原來不少人曾力勸她出山回巢。

網上曾流傳最想見的回巢藝人排行,梅小惠榜上有名,她說:「周邊朋友同家人話畀我聽,叫我快啲出返嚟做,好似講到我出返嚟舞廳做咁,哈哈!不過我都覺得電視台唔應該只有受尊重嘅藝人帶住年輕人,而冇咗 40 至 60 歲嘅中層,其實嗰啲人選大有人在,年長嘅藝人唔使咁吃力,所有電視台都應該百花齊放。」

至於曾志偉是否曾經聯絡她回巢?梅小惠表示:「總之大家係好朋友,知道理念係乜嘢,有需要幫手嘅話,一定一呼百應。佢教過我好多,何麗全都一樣,佢不屈不撓、有大愛精神,邊個都會幫,喺高位亦不亢不卑。佢哋年紀都唔算輕,依然喺市場上舉足輕重,就好似我家姐梅小青,60幾歲仲有人邀請佢歸隊工作,我希望做到咁樣!王祖藍更勁,佢行快我哋好多步,好有想法同堅持,唔好大驚小怪點解香港有咁多幕前人出現做高層,世界各地都一樣,好似特朗普做過主持人都可以做總統!」

談及舊友,近日電視台深夜重播小惠曾參演的電視劇《他來自江湖》,她卻感到無奈:「我寧願唔重播,我情願要返達哥(吳孟達)!」去年底小惠的舊愛曾偉權離世,她心平氣和回應只會記得對方的好,「我 21 歲見到筍嘢(曾偉權)就飛身過去,佢又高大又靚仔,第一日已經想(同佢)結婚,佢冇求過婚,因為我哋已經喺埋一齊。最後一次見係喺爸爸喪禮,我主動多謝佢......我冇乜嘢,我只會記得佢保護我,佢係好演員,曾教導我,又會車出車入,我想食腸仔包佢又周圍去搵畀我,呢啲就係美好嘅回憶!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner