兩台對撼丨無綫疑怕輸ViuTV《口罩小姐》 陳山聰新劇被迫讓路:會尊重公司決定

更新時間 (HKT): 2021.03.13 22:29

新增內容

無綫近年的綜藝節目被評「一蟹不如一蟹」,獨沽一味主打煮食節目,被主打打實況娛樂的ViuTV極速冒起,《全民造星》系列更將TVB打到落花流水,早前更宣佈在4月舉行首屆自家音樂頒獎禮「CHILL CLUB推介榜年度推介20/21」。

最近ViuTV又搞新意思,將於3月22日起,周一至五晚上9時半,播出由ERROR四子梁業(肥仔)、何啟華(Dee哥)、郭嘉駿(193)和吳保錡主持的真人騷《最後一屆口罩小姐選舉》。曾志偉入主TVB後,首要任務就是要收復失地,無綫疑擔心會輸畀《口罩小姐》,忽然將黃金時段劇集變陣,把已經開播,由陳山聰、姚子羚擔正演出的《大步走》調到8時半,改由較有份量的陳豪及李佳芯主演《愛美麗狂想曲》頂上,《愛》劇則由4月12日提早到3月22日9點半時段播出。而無綫昨晚亦已有《愛美麗》宣傳片出街,寫明播出日期是3月22日。

晚上,身為《大步走》男、女主角的陳山聰和姚子羚出席活動時,對於劇集被調時間,二人最初表示沒有聽過,但之後他們卻露口風,指無論公司有任何決定,都會配合和尊重。陳山聰說:「唔緊要啦,我哋無論改咩時間,套劇嘅宗旨都係希望畀人知道要逆難而上,跑道上又好人生上又好,遇到咩難題都好,只要你堅持爬起身,一定會跑到終點。」姚子羚則說:「其實而家啲劇好多時要配合內地一齊播,所以調時間係人之常情,況且我哋套劇未喺主台播,好多人已經喺網上睇咗,不過如果大家想支持我哋套劇,亦都可以繼續喺線上看。其實無論咩時段播出,我哋都會努力去宣傳套劇,希望帶更多正能量畀大家。」不過,晚上時份,無綫又再「彈出彈入」,《愛》劇宣傳片已刪掉播出時間,而《大步走》監製接受傳媒訪問時否認更改播出時間,及後無綫又稱《愛美麗》將接力《失憶24小時》在8點半時段播出,無綫內部似乎非常混亂。

Dee哥:純粹驚咗班女

何啟華今日接受《蘋果》訪問,問到有沒有受寵若驚?他說:「我諗並唔係話視我哋咩對手嘅,純粹驚咗班女,佢哋拍開嘢,有女通常觀眾都好鍾意睇,但我又唔係好擔心,因為佢哋都派出最擅長嘅自家劇出嚟,所以我都同一眾口罩小姐講句:『打和啦Super!』」他透露節目最大的殺手鐗是夠真:「真到完全冇造馬,foul走晒監製啲心水。」據悉首集已經由40人中foul走一半,5集後留低最後8強,並將於4月11日進行現場直播的總決賽,Dee哥續說:「ERROR係佢哋隊長,呢段時間大家都慣咗戴口罩,睇女仔眼同身材,最有身材嗰組去咗肥仔度,我嗰組身材唔係特別出眾,但都有啲嘅。」

其實《愛美麗狂想曲》早於2019年10月已經拍畢,有傳因為女主角李佳芯曾捲入政治風波而遭TVB雪藏,加上同劇的朱智賢偷食人夫,故劇集一直未安排於翡翠台推出。劇中李佳芯為一名失婚婦,重投職場擔任陳豪的秘書,Ali今次亦搏盡演出,其中一場戲指她飲醉後出現在陳豪家中,裸背示人,又以烈酒淋身,十分誘人。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner