高先影院丨曾麗芬第一份工李嘉誠面試 憑靈異片《午夜凶鈴》 成名贏「鬼婆」稱號

更新時間 (HKT): 2021.03.13 00:30

有錢會點用?炒股票、買磚頭是正路選擇,另類投資Bitcoin、玩車,各適其適,點計都不會是開戲院。有人愛挑戰,高先電影負責人曾麗芬(Winnie)逆思維,揀在堅尼地城搞影院。戲院上月已開幕,她表示第二間會陸續有來。

李嘉誠面試

其實Winnie並非第一次「捨易取難」,早前她在佐敦辦公室接受訪問,講述入行經過。嘉禾電影出身的她,提到自商學院修畢秘書課程後,就只打過一份工,她說︰「嘉禾係第一份,又係唯一一份工,嗰時聖心讀秘書科,校長介紹咗幾份工,其中嘉禾、香港電台,同埋返學校教書都有,爸爸又介紹我入長江(實業),佢同長江打咗好耐工。」事實上Winnie的offer不少,包括長實的秘書工作,原本在父親人脈下,大樹好遮蔭,最後卻揀了嘉禾︰「長江請咗我嘅,同爸爸一齊做事,嗰時返工喺北角......我唔想囉。面試見我嘅人係李嘉誠同洪小蓮,最先係見李嘉誠先生。入到去爸爸同李生講『我個女,啱啱畢業』,李生話『好吖......』,跟住就叫爸爸帶我見另一位主管。其實入到去,我都驚驚地,唔記得自己講過乜嘢。」她說是父親關係,所以拜候李先生,並非應徵他的秘書,但確實同屆有位同學,獲李嘉誠聘用。Winnie話對首富的印象有點模糊,只記得對方很和善、祥和,臉上掛着笑容。

入嘉禾做秘書

入到嘉禾,被派往旗下泛亞電影負責海外發行、買賣片的部門當秘書,她形容當時是浸淫在上海話同英語的世界,她笑說︰「部門主管沈杉係台灣人,佢同大老闆鄒文懷對話,夾雜上海話同英文,鄒生好鍾意請啲英文講得好嘅員工。」近水樓台Winnie開始涉獵買賣片、宣傳及排片上映工作。前後幾任泛亞主管離職,Winnie被臨時拉夫,到法國康城參加影展,想起當年情況她都忍不住笑起來︰「嗰時喺1982年,公司升我做主管,跟住就拉夫要我去康城買片,其實完全冇買賣片經驗。」頂硬上接手了整個部門,同電影正式結下不解緣。

洪金寶好食愛請客

在嘉禾,經歷了許冠文兄弟、成龍及《忍者龜》的豐盛年代,嘉禾辦公室設在斧山道片場,擦身而過粒粒都係巨星,成龍、洪金寶、元彪恍如路人甲,見怪不怪。Winnie話只要午飯時間在片場撞到洪金寶,就注定有食神,每次大哥都喜歡拉隊到尖沙嘴的樂宮樓食飯,一開就是一兩枱,其餘大上海、小上海周不時光顧。至於成龍較少請食飯:「鍾意同我哋傾偈,以前公司較細,人少好好玩;許冠傑試過聖誕節坐喺reception彈結他唱歌,好鬼好玩。」當時嘉禾設有3個試片室,一班員工私下命名,最靚的叫「碧麗宮」,其次是「新大華」同「油麻地」,鄒文懷用的自然是碧麗宮。而最好笑的,要數到Winnie每周都被「潛規則」,派去「招呼」老細︰「以前有間叫麗宮戲院成3,000個位,專做二輪戲。如果收得,套戲可以賺好多錢,佢哋老闆叫張太,逢星期六公司就會叫我去同佢打牌,我打親都贏。嗰時細個鍾意做牌,同事話『唔得㗎,你贏張師奶啲錢』。佢又唔介意喎,仲好鍾意搵我打,細個乜都唔驚,咪扮唔知囉。」

鬼片殺出血路

泛亞在Winnie帶領下,在港發行及宣傳過《侏羅紀公園》、《人鬼情未了》、《回到未來》、《風雲》等賣座片。好景不常,1998年嘉禾黃金時期不再,公司決定解散宣傳部,她眼見10幾位同事面對失業的徬徨,跟公司商量,自組公司請回原班人馬,其間會替嘉禾做發行同宣傳,Golden Scene正式成立。一年後入主嘉禾的澳洲幫跟原先人馬傾掂數,要求全數聘回宣傳部離職的舊人,條件是一個都不能少,Winnie說︰「同事意願都係返去,始終大公司。不過佢哋應承話會照幫我做宣傳,之後做咗兩年。我會為佢哋前途諗,當時我都未諗到自己想點,之後咪請過班人囉,班舊員工又話會兼顧埋我啲片嘅宣傳,好在嗰時我有套《午夜凶鈴》頂住。」《午》片以3,124萬元成為香港當年賣座冠軍,周星馳主演的《喜劇之王》只能屈居第二。Golden Scene及後憑一系列鬼片《鬼妻》、《不速之嚇》、陳可辛的《三更》及彭順、彭發導演《見鬼》殺出血路,被陳善之起了「鬼婆」外號。

高先公司名由來

講到Golden Scene公司名的由來,不少人都會聯想到同嘉禾(Golden Harvest)的英文名有關。Winnie解釋其實完全無關係,她說︰「當初係嘉禾會計師畀咗一堆名我揀,其實唔想用『Golden』,太多人用,又俾人覺得黐住(嘉禾)咁,諗住用住先嘅。到《午夜凶鈴》咁紅之後,又唔捨得唔用喎。其實一直揀片方針都冇乜點變,揀我鍾意嘅戲,而家唯一唔同嘅係唔做恐怖片,因為宗教原因。」她笑謂一點都不喜歡金色,只愛黑白,故新戲院用色獨沽兩味,非黑即白,沒有迴旋餘地。

另外,公司原本沒有中文名字,因為郵差經常將公司名讀成「高先」,將錯就錯變成公司中文名。早幾年因為DaDa陳靜在金像獎頒獎禮及高登仔加持,「高登先」的名字更不脛而走。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner