歐錦棠網上分享亞視劇《精武門》片段 TVB投訴侵犯版權要求下架

更新時間 (HKT): 2021.03.13 14:12
(網上截圖)

歐錦棠前日在其YouTube頻道《乜乜棠水舖》,以暢談形式分享1995年由亞洲電視拍攝的《精武門》幕後花絮,回顧他與甄子丹對打的場面。但上載不夠1天時間,歐錦棠隨即接獲TVB投訴,指《精武門》現有版權屬TVB所有,要求他立刻將有關該劇刪走或下架。

歐錦棠在facebook發帖文說:「是咁的,噚晚上線嘅最新一集《乜乜棠水舖》,今日被下架,原因係tbb投訴裏面有佢哋嘅版權片段。咦?乜原來佢哋買埋《精武門》咩?真係唔知喎!但係我見其他YouTube頻道一直都有精冇門丹丹啲片段,咁耐又唔理嘅?原因只有一個,就係《乜乜棠水舖》堅係好睇,連tbb面班友都係捧場客,所以十年唔做嘢,一做就呢單,一定係,除非唔係。我哋當然會尊重版權啦,所以製作團隊特別趕工剪咗一個新版,剪輯得好辛苦㗎,大家即刻click入去同我睇十次!」

今日接受《蘋果》電話訪問的歐錦棠說:「係接到YouTube投訴,我梗係第一時間拉咗條片落嚟,YouTube report畀我知邊段時間至邊段時間,我跟佢要求做,唔理製作人係邊個,唔使拗刪咗先,再換上另一剪輯版本。」對於下次會否小心處理,他說:「外國YouTuber都會講電影,外國版權仲緊要,我今次用咗10幾秒嚟講,片段都係喺網上揾,希望佢哋對我揸得緊同時對其他都一樣。」歐錦棠指網友對他被TVB投訴事件反應很大,但同時令其頻度點擊飆升。

接獲投訴後,歐錦棠昨日將片段重新剪輯上架,還在新上載的片段加以標籤說明:「由於TVB擁有版權,大家自己揾原片睇啦﹗邊會估到亞視劇集係TVB版權。」片尾仍保留看到《精武門》幕後片段的預告。其實,早於2015年,無綫出價1000萬元購買亞視2000小時、相等於約80部的武打劇集,當中包括多套經典作品《洪熙官》及《精武門》等。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner