鄭中基海濱騷車輛套票被掃光 
RB演唱會預售秒殺 宣佈加場

更新時間 (HKT): 2021.03.13 02:00
■RubberBand前晚拍片呼籲樂迷買飛,昨日預售甫開始,門票已被秒殺。互聯網圖片

樂隊RubberBand(RB)和鄭中基將在下月分別舉行演唱會,門票同樣在昨日優先預售,反應皆十分熱烈。RB下月4及5日在紅館舉行「RubberBand Ciao 2021」演唱會,門票昨早10點優先預售,但僅僅一分鐘便全部售罄;昨晚RB即宣佈於下月3日加開一場,即合共三場。而鄭中基下月舉行首個drive in演唱會,設有近百套售價6,000元的四人一車套票,雖然有人指售價略貴,但開賣不久亦光速售罄,由此可見樂迷的確「餓」show太久,誓要進行「報復式看演唱會」。

「一齊印證時代」

對於門票被秒殺,主音6號昨日回覆《蘋果》表示:「好suprised,好感謝啲朋友樂迷一早10點就上網狂click,我起身後都有回應朋友,一係等到17號公開發售。𠵱家決定開多一場,希望多啲朋友可以嚟感受,今次個騷比起三年前更加有時代印記,三年前係比較自我團隊,但今時今日已好唔同,就喺呢個時代切入點同大家一齊印證。」至於同期的鄭中基演唱會反應同樣熱烈,6號坦言十分開心,以前開騷睇騷是平常不過,但現在卻要經歷起落,祈求疫情不要反覆。加場與另外兩場的門票,將於下周三公開發售。

鄭中基下月24至25日於中環海濱舉行「Drive In Ultra - WEE are Ronald Cheng自駕演唱會」,昨日公門票公開發售,車輛套票被掃一空,而座位門票亦僅餘少量。演唱會主辦發言人Kenny昨日回覆《蘋果》時表示,之前已有不少super car,如法拉利及林寶堅尼等的車會也問及售票情況,因此他相信屆時會有不少此類車的車主捧場。Kenny同時表示入場的車輛全部皆會檢查人數,以及給名牌識別,以防有人偷運其他人入場,他謂:「其實有人問點解唔做全場都係坐車睇騷,但計過場地只可容納500架車,維持唔到成本,因製作費都過千萬,同埋我哋唔想只有車嘅人先可以睇。」鄭中基的YouTube頻道昨日也有上載短片,解答今次個唱疑問。

林二汶積極備戰

除了RB及鄭中基外,林二汶和梁嘉茵(Serrini)亦將在本月底及下月在紅館及旺角麥花臣場館開騷,兩人的門票同樣售罄,而林二汶近日積極備戰,前晚她在社交網貼出跟樂隊合照,當中何韻詩胞兄何秉舜出任音樂總監,網民大呼期待。

娛聞樂陪你走遍全球追星,即Like「娛果」FB 專頁!
BannerBanner