高先影院老闆曾麗芬走過癌病幽谷 已搵接班人:佢比我更愛香港電影

更新時間 (HKT): 2021.03.13 00:30

在香港立足36年的UA院線,在毫無先兆下結業,戲院業敲響了喪鐘。據知,UA旗下6間戲院,在過往幾年每間都要蝕錢,除歸咎UA用天價搶戲院外,有所謂「拍電影難,做戲院更難」。偏偏在眾人皆醒之際,高先電影公司負責人曾麗芬(Winnie)獨醉,在堅尼地城開戲院,以「高先」命名的電影院已於上月中,戲院重開時開幕。這份「血」Winnie自言始於嘉禾年代,卻因為心力交瘁捱出病來。

兩度患上癌病

在電影發行界Winnie素有「四大美人」之稱,但她笑言從未聽過,反而最多人叫她做「鬼婆」。Winnie一身素黑打扮,是她最愛的顏色,影院用色亦主打黑白。她頸上掛着十字架,信仰兩助她走過死蔭幽谷︰「相信係神嘅恩典,第一次話有腫瘤大概係2003、2004年左右,嗰時仲係兩個腫瘤,前後睇咗6個醫生都話係cancer。」當時她先後睇過6位醫生,抽血、CT Scan、MRI(磁力共振掃描)都顯示是癌症無疑,就連腫瘤學系教授莫樹錦都斷定無疑。當時雖然有信仰支持,但心情低落同驚,都是人之常情,直到做完手術後,謎底才解開︰「知道有病梗係會唔開心,又要cancel咗啲trip。最後做咗手術出嚟發現唔係cancer,醫生話原來係兩個子宮,最後藥都唔使食。」

要發生的事,始終在2019遇上,當時證實患上乳癌,確診初期Winnie責備自己︰「嗰段時間真係好多壓力,又要搬office,又好多嘢。覺得自己好唔愛錫自己,通常有cancer都係咁,所以勸大家唔好畀壓力自己。其實嗰時5月做手術,之後社運事件睇電視都覺得好唔開心,好彩最後都復原得好好。」

發行到拍片「我搞掂」

高先電影由電影發行到近年投資拍片,有陳果導演的《那夜凌晨,我坐上了旺角開往大埔的紅VAN》、黃修平導演的《狂舞派》、黃浩然導演的《點對點》等。有行內人講笑話Winnie近幾年講得最多的一句是「我搞掂」,凡有新晉導演又或者找不到投資的題材,都可以找她幫手籌資金。Winnie笑笑口反問︰「邊個講㗎?係咪黃修平呀。」講起二人的淵源,要數到多年前台灣金馬獎創投會,原先Winnie想到黃修平的攤位撐場,她說︰「見佢好努力,好感動佢做咗好多嘢,都未開到(戲),咪約咗佢返香港傾。」最後拍成《狂舞派》大收1,316萬元,成績非常好。Winnie訪問中強調「得啦,我搞掂啦」應該只講了一次,並不經常講。Winnie拍片的「血」源於嘉禾年代,在嘉禾後期開始做埋中文片,又睇吓劇本,自此便入了血。高先開頭沒有資金做,到後期越來越鍾意做港片。

近年差不多新晉導演,都跟她拉上關係,由陳志發《點五步》、黃進《一念無明》、陳小娟《淪落人》,到近日被譽為「高先三寶」的《叔·叔》、《金都》及《幻愛》等都是。Winnie話拍片同揀片喜歡「人棄我取」,所以新導演都喜歡找她合作。黃修平在訪問中形容對方為現代俠女︰「我覺得Winnie喺我心中係一名俠女,係一名低調,但能量好大嘅俠女。當時佢同我哋講咗說話: 『人哋覺得唔得嘅,我最鍾意做。』我覺得呢句話好有型,亦係默默做,相信有價值、對嘅事情,佢就會低調咁做。」講到Winnie亦不得不提《十年》,她說︰「其實我要講返,嗰時《十年》香港唔係我哋發行,因為冇戲院同佢做。開頭係一間戲院做,後期做到好多院線加入,突然就冇咗戲院,佢哋嚟搵我哋,仲有邊啲可以做,高先就同佢哋做iTunes、Google Play,我哋係負責海外發行。本地發行係佢哋自己搵戲院放映。」

《搶錢家族》成功搶錢

高先電影成立初期以發行為主,Winnie雖然被稱為「鬼婆」靠靈異片起家,但她自言印象最深、打得最漂亮一仗,是90年代替嘉禾引入日本片《搶錢家族》︰「嗰時得灣仔間影藝戲院上,做咗500幾日(實際上映524日),收1,100幾萬,打破了香港電影上畫日期最長紀錄,賺咗好多錢,嗰時用咗3萬美金(約23萬港元)買斷,仲唔使分紅。」保守估計《搶錢》就賺了400多萬元,當時太古城買一個實用面積580方呎的高層單位,大概是400萬元左右。日本電影有市場,1992年她再引入《五個相撲的少年 》,上映321天,票房698萬元,引發各發行商開始一窩蜂搶日本片,片價水漲船高。Winnie轉而向絕不流行的泰國片埋手,她分享自己揀片心得︰「揀戲最緊要過得自己,唔好諗一個gimmick去跟風做,要真係拍得好、我都鍾意嘅,唔好諗乜嘢類型,就算以前發行啲鬼片,都係拍得好。」之後泰國片《人妖打排球》、《鬼眼》、《鬼妻》開闢了另一條戰線。

已安排接班人

Winnie近作是開戲院,正當人人都認為戲院無所作為的時候,她再一次發揮人棄我取的「拼勁」。搞戲院一直都是Winnie的夢,影圈數十年,差不多每個崗位都涉獵,單單就是未搞過戲院,她說︰「從發行角度,有間戲院會好適合,可以排一啲自己真係鍾意嘅戲,有時你鍾意,人哋(戲院商)未必鍾意,排得會比較辛苦,有自己戲院會自由好多。」疫情下開戲院確實有難度,Winnie試過有兩位大股東去年退股,驚過,最後問題解決︰「有冇諗退休?我起碼要做十年啦,因為呢間戲院至少10年。跟住畀我姨甥Felix接手,佢好熱愛電影,比我更愛香港電影,係我接班人。」Winnie喜歡非黑即白,戲院用色反映個人喜好,戲院地址亦再強調「呢度係堅尼地城」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner