Naomi被張致恒老婆點名搵黑社會追數 反建議報警打地盤工還錢

更新時間 (HKT): 2021.03.14 20:48

張致恒(Steven)上月被指欠債纍纍,有報道估計,欠款大大小小加起來逾40萬,但Steven一家四口仍有養三隻狗、搬往石崗村屋新居。曾借2萬元予Steven的𡃁模馮鎵瀠(Naomi),日前在facebook開post催還錢,與Steven老婆雯雯隔空展開口水戰,最後雯雯將IG相片清空,僅在IG story放負:「點樣先可以放過我同兩個仔,唔再生存,係咪先可以畀我哋平靜過?」

事隔約兩星期,雯雯今晚更新IG,以長文點名向Naomi解釋生活逼人,已盡力還錢,更指摘Naomi威脅自己家人還錢,其間涉及黑社會追數。

雯雯:用屋企人威脅我哋還錢畀你?

雯雯首先道歉遲還款並感謝Naomi曾借錢過生活,又澄清一家人沒有「走佬」避債,甚至曾為籌錢還款,向財務公司借錢,但仍無能力一次還清2萬元欠款。雯雯自言正承受苦果:「我哋亦已經承受緊我哋要承受嘅,比財務貼街招甚至追上門。」並許下承諾,將於兩個月內還清餘額。

雯雯承認面對「好大嘅經濟困難」,稱明白自己一家人欠債,被追數理所當然,但旋即指摘Naomi為追數用盡手法,她指:「但係點解叫我哋還錢嘅時候,要用我屋企人嚟威脅我哋去還錢畀你?點解要講到搵黑社會去騷擾我嘅媽媽拎返屬於你嘅錢?」又向Naomi求饒:「我拜托你唔好騷擾我嘅家人。希望你可以放過我嘅家人。」雯雯透露Steven 現時有少量工作,已逐一還錢給債主,只是未能一次過還清所有欠債。

代Steven求情:男人衰鹹濕要判死刑?

對於被指生活富足,雯雯全部否認,她指新屋租金與舊居一樣,並非租住整棟村屋,而村屋只有地下適合養狗。至於寵物在與Steven拍拖前已養,視作「命根」,寧願自己食少一餐半餐,都可以繼續飼養,又說:「我做唔出我窮就要放棄佢哋」、「如果我係結咗婚冇經濟能力先去養佢哋,我俾人鬧係我抵死,但係佢哋已經同我一齊生活咗八年,我希望大家可以放過我唔好再去逼我放棄佢哋。」

雯雯又代Steven求情說:「一個男人衰鹹濕、衰貪玩,係咪就要判佢死刑?既然佢而家咁努力去生存,點解唔可以畀啲時間佢慢慢做返好佢。」雯雯又說兩名兒子無辜,自覺自己欠債「有罪」,但不希望小朋友受同樣的「罪」而被指指點點,感謝家人好友畀利是錢小朋友買玩具。

Naomi稱曾介紹財務公司

Steven債台高築,BOYZ隊友關智斌、好友林盛斌等都是債主,惟只有Naomi被雯雯點名,她立即被焫着,回覆《蘋果》時講述為何當日心軟借出2萬:「當初係張致恒話英皇同佢開嘅演唱會要自己投資,資金周轉唔到,大陸嘅工作未出糧,問我借2萬,答應一個月後還,演唱會前就爆出未婚產子,拖欠多名女生債務,我始知被騙。」Naomi續說:「2019年尾,張致恒承諾每月還500元,但可惜一毫子都冇還過。」其後她從報道得知雯雯添置家具,在私人facebook賬戶呻才令欠債事件曝光。

第一次爆出Steven欠債,他即日主動聯絡Naomi謂願還款,Naomi說:「佢話下午三點約咗財務公司借錢還畀我,當日大概下午5點,佢覆我話財務公司只借到5,000蚊畀佢。我話唔得,我一定要收晒所有錢,因為而家我知道你有錢還畀我,佢就過數過咗10,000蚊畀我。」Naomi當時要求一個星期還清埋餘下10,000蚊欠款,最後無下文。

雯雯在長文中稱有黑社會追數,矛頭直接指向Naomi,她否認並叫雯雯報警,又否認騷擾雯雯家人:「我係話使唔使搵佢屋企人幫佢手還錢畀我。」而Naomi稱曾介紹財務公司給雯雯:「財務公司可以上門接佢哋去公司借貸,車錢都唔需要佢哋出。」Naomi亦曾建議Steven返地盤散工搵錢,分擔家庭使費,可以養活一家四口。」Naomi指Steven細佬曾建議不要再追尾數,Naomi一口拒絕:「我清楚表明,我一定要收。有手有腳,唔該正正經經出去工作,欠債還錢天經地義!佢一家被財務公司追債與我無關⋯⋯要人放過佢一家人,就係還錢畀所有債主,包括財務公司!」

Naomi反嘲:我冇餘錢唔會養寵物

Naomi更嚴詞斥責雯雯,不要用其他人或寵物做擋箭牌:「唔好上網打一大段廢話,而唔去工作賺錢還錢,仲要理直氣壯覺得自己生咗兩個仔、養寵物,無錢同能力養,全家靠賒借度日係合情合理!我哋借錢畀張致恒嘅所有人,係無義務去幫你一家過優質生活。我冇多餘錢去養寵物,我無錢就唔會生小朋友,量力而為。」她又稱收到風Steven沒財困:「Steven屋企飲支裝水,建議翻煲自來水會經濟好多,HKTV mall送貨都要買指定金額,食街市餸會平啲,希望張家學吓知慳識儉啦。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新:iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner